NAKADAWAT ang Kagamhanang Probinsiyal og suwat gikan sa Bohol Provincial Party Committee ilawom sa Communist Party of the Philippines-New People’s Army (CPP-NPA) nga matud pa adunay gubot nga mahitabo tali sa goberno ug rebelde sa sunod nga mga tuig.
Naglakip sa suwat ang kabahin sa pagkatawo sa gitumbok nga high ranking official sa walhong kalihokan nga si Elizar Nabas kinsa bag-ohay pa lamang nitahan sa iyang kaugalingon ngadto sa mga otoridad pinaagi ni Gobernador Aris C. Aumentado.
Apan luyo sa maong hulga, naninguha si Aumentado nga maka-estorya ang walhong grupo sa linaw nga paagi sa bisan asa nga lugar tungod kay matud pa sa gobernador dili kalaban ang goberno sa walhon nga grupo ug tabangan pa sila nga makalingkawas sa sayop nga pakigbisog ug manginabuhing malinawon.
Kini ang usa sa mga mensahe nga gipadangat ni Aumentado atol sa kataposang adlaw sa lima ka adlaw nga Disaster Preparedness Search Rescue and Release Training sa kapin 60 ka mga kapolisan nga gipangulohan ni Bohol Police Provincial Director, Col. Lorenzo Batuan.
Ang lima ka adlaw nga training sa PNP Bohol nagtinguha nga mahimo kitang andam kon ugaling adunay mga kalamidad nga mahitabo ug aron malikayan ang posibling casualties panahon sa sakuna.
Samtang nagpahinomdom usab ang gobernador sa mga kapolisan nga mag-amping sa ilang matag kaugalingon. Ug mihangyo usab nga doblehon ang ilang pag monitor sa pagbantay sa kahapsay ug kalinaw sa lalawigan labi na gayod Ang padayong pakigbatok sa ilegal nga kalihokan sa drugas.
Ang sayop nga nga ideolohiya maoy usa sa hinungdan sa kagubot diin ang kalinaw makab-ot lamang pinaagi sa pagsinabtanay, paghigugmaay, panaghiusa ug labaw sa tanan may kahadlok sa Labaw’ng Makagagahum. ( AND )
