Napamatud-an sa Kagamhanang Probinsyal sa Bohol nga ana-a gayuy nagkontrolar sa presyo sa isda dinhi sa lalawigan.
Nasuta kini sa dihang dihay niabot nga mga isda gikan sa Zamboanga City ug gibaligya sa mga merkado dinhi sa Bohol.
Barato ang isda gikan sa Zamboanga City kaysa mga isda nga gibaligya sa mga merkado sa probinsya ilabina sa siyudad sa Tagbilaran.
Sa nabantayan sa Kagamhanang Probinsyal sa dihang niabot ang mga isda nga gikan sa gawas sa Bohol, nibarato usab ang mga isda nga gibaligya sa merkado.
Kon P180 ang presyo sa usa ka isda gikan Zamboanga City, niubos ngadto sa P160 ang presyo sa susamang isda nga gibaligya sa mga merkado. Ug kon ana-a sa P140 ang presyo sa isda nga gikan sa Zamboanga City, mas niubos usab ang presyo sa isda nga gibaligya sa merkado sa dakbayan sa Tagbilaran.
Diha natuki nga ana-a gayuy kartel sa isda dinhi sa Bohol.
Ang pagsindikato sa mga presyo sa isda dinhi lakip na ang ubang seafood, maoy naghatag og bati nga imahe sa Bohol ilabina sa mga langyaw nga turista nga nibakasyon dinhi. Maayuha na lang kay nahimuang og aksyon ni Gob. Aris Aumentado.
Pangagpas sa uban nga dili imposible nga anaay mga dagkong negosyante nga nagkontrolar niini lakip na ang mga korap nga politiko.
Ang lakang sa Kagamhanang Probinsyal sa paglusad sa Project ISDA dako og tabang sa yangungo sa mga Bol-anong konsumidor.
Ug manghinaot nga magmalampuson o anaay lahutay nga solusyon sa dugay nga suliran sa probinsya.
