USA ka barangay kagawad nga giingong high value target (HVT) , nadakpan sa buy-bust operation didto sa Purok 2, Barangay Madua Norte, lungsod sa Duero mga ala 1:45 sa hapon kagahapon, Nobiyembre 17.
Ang suspetsado giila nga si Leandro “Roy” Bernil Peligro, 40 anyos, minyo, kasamtangang barangay kagawad, residente sa Purok 3, Brgy. Madua Norte, Duero, Bohol.
Ang ginsakpan sa Duero Municipal Police Station Drug Enforcement Unit, nagpahigayon og buy-bust operation batok sa maong suspek.
Napalitan ang suspek og usa ka gamay’ng putos nga giingong shabu kantidad og P500.
Laing nakuha gikan sa iyang posisyon ang upat ka gagmay’ng putos nga may sud gituohang shabu, usa ka basiyo sa posporo, usa ka lighter ug P35 nga salapi nga gituohang kita sa maong ilegal nga kalihokan.
Gibanabanaang motimbang tanan ngadto sa 0.80 gramos ug may Standard Drug Price nga mokabat ngadto sa Php 5,440.
Kasamtangang gibilanggo sa Duero PNP ang maong dinakpan. Ug pasakaan og sumbong paglapas sa Akta Republika 9165 kun Comprehensive Dangerous Drugs Act of 2002 didto sa piskaliya. ( ALAN ANDY NALZARO DALAGAN )
