TAGBILARAN CITY, Bohol, Dec 20 (PIA) –Nagpa-abut na lamang sa pagpirma sa mga kontrata ang Department of Education sa Bohol ug Tagbilaran City Divisions aron kasugdan na og ayo, pagpahiuli ug pagtukod og balik sa 32 ka classrooms, usa ka tuig human gilampurnas sa bagy nga Odette ang mga imprastraktura sa edukasyon.
Kini human ming-abut niadtong Disyembre 9 ang Special Allocation and Release Order (SARO) gikan sa nasudnong kagamhanan alang sa pagpahiuli ug pagtukod og bag-ong classrooms hulip sa 32 nga mga tunghaan nga nangapay-ag human molabay ang mangtas nga bagyo.
Kinatibuk-ang P228 M ang gikataho nga SARO, segun pa sa DepED.
Kon malagdaan na kini sa contractors, magsugod na dayon ang pagpatukod ug pagpahiuli sa mga nangaguba nga classrooms, segun pa sa ahensya sa edukasyon.
Didto sa Capitol Reports niadtong miaging Biyernes, gitaho sa DepED Bohol Division nga ming-abut sa 289 ka classrooms ang hingpit gyud nga naguba ug lain pa nga 3,599 ka mga classrooms ang kinahanglan pang ayohon aron mahimong luwas alang sa klase.
Sa 289 ka classrooms pa lamang, kapin na sa usa ka bilyon ang kinahanglan aron kini kahulipan, subay usab sa total damage-assessment report sa DepED.
Sa laing bahin, sa 3,599 ka mga classrooms nga partially damaged, magkinahanglan usab ang kagamhanan sa laing P1,046,361,148 aron mapahiuli o matukoran og mas lig-on nga mga klasehanan.
Hinuon, sa ilang giprograma nga rehabilitasyon, segun pa sa DepED, mingkabat na sa P230 milyones ang nagasto sa DepED sa pagpa-ayo ug pagpahiuli sa pipila ka mga classrooms aron lang gyud luwas nga sudlan sa mga bata niadtong gibalik ang face-to-face classes niadtong miaging buwan.
Gawas pa niini, lain nga 142 ka classrooms ang karon gihimoan og Program of Works aron kapunduhan na usab, dugang sa ahensya.
Sa laing bahin, sa Tagbilaran City Division, mingkabat sa 70 ka classrooms ang nangaguba ang gibanabana nga manginahanglan og P25M aron ikapahiuli ngadto sa luwas nga klasehan.
Kini usab samtang nagpadayon ang City Division sa pag-puli sa mga sagunting sa Dr Cecilio Putong National High School gamit ang Special Education Funds niini, segun pa sa DepED.
Kini usab samtang angpaabut ang mga tinugyanan sa edukasyon nga ipagawas na sa kagamhanan ang ikaduha nga hugna sa Quick Response Funds alang sa major repairs ug new construction ang ahensya samtag magpadayon pa gihapon ang sistema sa pagdawat sa mga tinun-an sa klase niining panahon nga padayon pa ang hulga sa sakit. (PIA-7/Bohol)
