GIPALIG-ON sa Korte Suprema ang guilty nga hukom sa Ombudsman ngadto sa kanhing mayor sa lungsod sa Panglao sa kasong Grave Misconduct and Negligence sa paglapas sa Election Appointment Ban niadtong tuig 2003.
Sigun sa report sa usa ka online news nga sa 15 ka pahinang petisyon nga dunay petsa Hulyo 27 ug gi publikar niadtong Oktubre 20 ang Supreme Court Second Division niingon nga sakto ang hukom sa Ombudsman nga ang kanhi Mayor sa Panglao nga si Leonila Montero adunay gidapigan ug in bad faith sa dihang nagbutang siya og upat ka consultant nga napilde isip pagka kandidato sa piniliay.
Matud ni Supreme Court Associate Justice Marivic Leonen aron mahimong regular ang mga appointment giingon nga nakigkunsabo si Montero sa iyang bana ug anak nga babaye nga mga sakop sa Sangguniang Bayan sa Panglao aron mapadali ang pagpasar sa upat ka resolution.
Gikuhaan og habig si Montero apan wa kini motubag sa text message sa pangutana kabahin sa iyang plano isip tubag sa maong desisyon sa Korte Suprema.
Niadtong tuig 2018, gimando sa Ombudsman ang dismissal ni Montero human siya namatud-ang sad-an sa Grave Misconduct, usa ka rason sa pagdili og hupot og katungdanan sa publiko. Pagkahuman gipasaka niini ang kaso sa Sandigan Bayan.
Sa pagsugod niya sa pangatungdanan niadtong Hulyo 1, 2013, gikuha ni Montero si Noel Hormachuelos isip municipal administrator, Danilo Reyes isip public information officer, Fodulan isip Public Employment Service Office Coordinator ug Penales isip consultant sa mga Infrustracture and Engineering Services.
Gi-sentensyahan si Montero og napulo ka tuig nga pagka priso ug 1.3 milyon pesos nga multa alang sa iyang Civil Liability.
Gimandoan si Montero nga bayran og 1.3 milyon pesos ang LGU Panglao alang sa mga sweldo ug benepisyong gibayad ngadto sa upat ka mga job order personnel apil na ang legal nga interest.
Gipalig-on usab sa Anti-Graft Court ang Hold Departure Order kun HDO batok ni Montero kinsa kasamtangang konsehal karon sa Panglao. ( AND )
