PATAY ang usa ka lalaki human gipusil sa makaduhang higayon sa wa mailhing mamumuno didto sa Purok-4, Barangay San Isidro, siyudad sa Tagbilaran niadtong Lunes pasado alas 9:00 sa gabii.
Ang biktima giila nga si Christian Petus, 27 anyos, way trabaho, lumad nga molupyo sa Upper Salazar, Brgy. Ubujan, siyudad sa Tagbilaran.
Base sa imbestigasyon sa Tagbilaran City Police nga ang biktima luwan sa usa ka motorsiklo gikan sa dan J.A. Clarin subay sa dan Andres Budlong, paingon unta sa Brgy. Libertad, lungsod sa Baclayon. Dihang pag-abot sa maong dapit, gipusil sa makaduhang higayon sa wa mailhing suspek.
Nahiagom ang biktima og samad pinusilan sa wala nga liog ug aping hinungdan sa iyang hinanaling kamatayon.
Nakuha gikan sa patay’ng lawas sa biktima ang usa ka putos nga may sud gituohang shabu, usa ka kabhang sa kalibre .45 ug cellphone niini.
Padayon pang gisusi sa kapolisan kun unsa ang motibo sa maong hitabo. ( ALAN ANDY NALZARO DALAGAN )
