NAKALINGKAWAS sa kamatayon ang usa ka lalaki human giingong gipusil sa silingan niini kay gisabaan sa tugtog sa musika atol sa kasaulogan sa pasko didto sa Peñaflor Street, Barangay Taloto, siyudad sa Tagbilaran mga alas 12:50 sa buntag niadtong Dominggo.
Ang biktima giila nga si Felix Bartolome, 43 anyos, minyo.
Ang suspetsado nailhan nga si Amado Diaz, 74, minyo, pulos lumolupyo sa maong lugar.
Sigun sa taho nga ang biktima kuyog sa iyang asawa personal nga ni-report sa Tagbilaran City Police Station mga alas 7:40 sa buntag ug nialegar nga mga alas 12:50 sa kaadlawon, samtang sila nagsaulog sa adlaw sa pasko kauban sa ilang mga anak, nagpatukar sila og mga musika aron alegre ug sadya ang maong kasaulogan.
Dihang nangihi ang biktima sa ilang tugkaran, ilang nakit-an ang suspek nga gituohang adunay armas nga moboto nga dala niini. Ug nakig-estorya kini sa caretaker sa compound nga ilang gipuy-an nga ipahunong ang musika nga nagtukar sa ilang balay. Ug ang biktima miingon lang sa suspek nga “pasko man karon unya hinay raman usab ang musika nga among gipatukar”.
Apan sa way daghang pangutana, ang suspek nipusil sa biktima apan swerte kay wala kini maigo ug nakatago kini ug gi-utrohan pagpusil sa ikaduhang higayon. Dayong lakaw sa suspek ug miingon pa kini sa biktima nga wa siya mahadlok bisan pa sa unsang aksyon nga pagahimoon sa maong biktima.
Gi turn-over usab sa biktima ngadto sa kapolisan ang kabhang sa basiyo sa armas sa kalibre .45 nga gituohang maoy gigamit sa suspek.
Padayon pa ang follow-up nga imbestigasyon sa City PNP. ( ALAN ANDY NALZARO DALAGAN )
