GRABENG hingsamdan ang usa ka lalaki human gitigbas sa iyang bilas nga silingan niini kinsa gisabaan sa pagkantakanta og videoke didto sa Purok 5, Brgy. Mandawa, lungsod sa Bien Unido mga alas 10::40 sa gabii niadtong Huwebes, Nobiyembre 10.
Ang biktima giila nga si Jonathan Mercader y Ceros, 32 anyos, ulitawo, may live-in partner.
Ang suspetsado nailhan nga si Joselito Añora y Lofranco alias Julito, 50, minyo, mag-uuma, pulos molupyo sa maong dapit.
Sigun sa imbestigasyon sa Bien Unido Police Municipal Station nga samtang ang biktima uban sa iyang kapuyo nga si Marive Garcia, Ryan Otara ug Christian Elicano didto sa sud sa balay sa iyang ugangan nga si Panfilo Garcia nagtagay ug nagkanta-kanta sa videoke. Dihang ang suspetsado nga ilang silingan natulog kauban sa iyang pamilya, nasuko kay gisabaan dayong nisinggit nga ipahunong ang videoke kay oras na sa curfew.
“Gisabaan kay naay mga estudyante, daghang anak, ” butyag ni PMsg Loyd Garcia sa Bien Unido PNP.
Matud ni Garcia nga wa mopatuo ang maong biktima. Hinungdan nga nikuha ang maong suspek og sundang ug pagkataud-taud, kalit niabot sa maong ang suspek nga nagbitbit og sundang. Dayong gitigbas ang biktima tumong sa liog apan nakalikay kini ug naigo kini sa ulo. Nikuha og bangkito ang maong biktima nga gigamit sa pagsagang hangtud nga nauwang sa mga silingan.
Nahiagom og dakong samad tinigbasan sa walang bahin sa ulo ibabaw sa dunggan.
Dali kining gidala sa Municipal Health Office sa maong lungsod ug gibalhin didto sa Garcia Memorial Provincial Hospital sa lungsod sa Talibon. Diin aduna kini walo ka mga tahi sa íyang samad.
Samtang nisurender ang maong suspek ug gitugyan niíni ang sundang nga may 12 ka pulgada nga gitas-on nga gigamit sa krimen sa nirespondeng kapolisan.
Giandam na ang tukmang sumbong nga frustrated homicide nga ipasaka batok kaniya sa piskaliya. (ALAN ANDY NALZARO DALAGAN)
