LALAKI nga giingong may diperensiya sa pangisip, gipusil human misuway sa pag-atake sa nirespondeng kapolisan gamit ang usa ka mahait nga sundang dihang nanghasi didto sa Sitio Tumuran, Brgy. Poblacion, lungsod sa Candijay mga alas 11 sa buntag kagahapon, Enero 6.
Ang suspetsado giila nga si Renato Dosol, 34 anyos, ulitawo, taga Sitio Saranggani, Brgy. Poblacion, Candijay, Bohol.
Sigun sa taho nga may usa ka concerned citizen nanawag sa Candijay Municipal Police Station, kalabot sa usa ka lalaki nga giingong may sakit sa pangisip kinsa nagbitbit og sundang, nanghasi ug nanggukod sa mga motorista nga nanglabay sa maong dapit.
Ningresponde ang ginsakpan sa Candijay PNP pinangulohan ni PMAJ Gerald A. Luna sa maong dapit. Ug pag-abot nila sa maong lugar, ílang nakit-an ang maong suspek nga nanghasi ug nakaingon sa daghang mga sakyanan nga nagpundo.
Nagpaila dayon sila nga mga polis ug gimandoan kini nga ibutang ang dalang sundang niini. Apan giingong wa kini mopatuo ug misuway sa pag-atake sa mga polis. Hinungdan nga gipusil ug naigo sa hawak.
“Dugay nang wa kainom og tambal, mao seguro nibalik ang iyang kundisyon, ” butyag ni Patrolman Kim Cuñado sa Candijay PNP.
Daling gihatud sa Candijay Community Hospital ang maong suspek. Ug pagkahuman nga nadapatan og tambal, gikustodiya na kini sa Candijay PNP.
“Tapsing ra kay way intensiyon nga patyon, igo rang gi-neutralize, ” dugang ni Cuñado. (ALAN ANDY NALZARO DALAGAN)
