NAANGOL ang usa ka 77 anyos nga lola human aksidenteng nabanggaan og motorsiklo samtang nitabok sa nasudnong dalan didto sa Brgy Del Carmen Sur, lungsod sa Balilihan mga alas 3:30 sa hapon niadtong Sabado.
Ang biktima giila nga si Teresa Capuno, dalaga, lumolupyo sa susamang dapit.
Ang nagkabangga nga drayber nailhan nga si Ramonito Torrentira, 35, ulitawo, laborer, taga Brgy. Mantalongon, lungsod sa Sagbayan.
Sigun ni PSMS Ralph Renoblas sa Balilihan Municipal Police Station nga samtang si Torrentira luwan sa íyang Euro 150 kolor blue nga motorsikllo, nagdagan gikan sa íyang gitrabahoan sa lungsod sa Dauis padung na untang mopauli. Dihang pag-abot sa maong lugar duol sa Central Elementary School, kalit lamang nitabok ang maong biktima sa pikas porsiyon sa karsada. Hinungdan nga aksidenteng nabanggaan.
“Naka-brake ang drayber, pro apeke na, ” butyag ni Renoblas.
Nakaangkon og angol sa tuong bahin sa lawas ug mga pangos ang biktima ug daling gidala sa Gov. Celestino Gallares Memorial Hospital sa siyudad sa Tagbilaran.
Samtang gikustodiya ang maong drayber sa kapolisan apan gibuhian human nagka-settle sa pamilya sa nasampit nga biktima. (ALAN ANDY NALZARO DALAGAN)
