Gipasabot ni Bise-Presidente Sara Duterte-Carpio ang kahalangdon sa maayong pang-gobyerno sa pagresolba sa mga kagubot sama sa mga gubat, kay kon ang nga opisyales sa gobyerno anaay integridad ug dedikasyon sa serbisyo-publiko, mao kini magpugong sa katawhan nga mohimo og mga bayolenteng lakang.
Sa iyang speech sa Kusog Mindanaw Conference sa Davao City kaniadtong Biyernes, si VP Sara niingon nga ang Mindanao nakasinati karon og “peace time,” nga maoy maghatag og higayon sa gobyerno aron matubag ang mga problema nga mugna sa mga teroristang grupo kinsa moduslit og kasuko ug mag-aghat sa katawhan nga banggaon o supakon ang gobyerno.
“Peace is a delicate, fragile beauty. It needs constant attention. In the case of Mindanao, it does not only need our continuous attention; it needs our constant, collective attention,” dugang ni Duterte.
Matud niya, ang mga niaging pinakataas nga lider sa Pilipinas naningkamot aron makabaton og kalinaw sa Mindanao sama sa paglagda sa 1996 peace agreement tali sa Moro National Liberation Front ug ni kanhi Presidente Fidel Ramos, lakip na ang 2014 Comprehensive Agreement on the Bangsamoro nga gipirmahan tali ni kanhi Presidente Benigno Aquino 3rd ug sa Moro Islamic Liberation Front.
Sakto si Inday Sara, kay kon maayo ang pagdumala sa mga ana-a naglingkod sa gobyerno, kinsa ba’y mosupak? Kon ana-a man gani maihap ra, kadtong anaay dautang motibo.
Dinhi sa Bohol, usa sa dakong opisyales sa NPA nihatud sa iyang kaugalingon ngadto sa AFP pinaagi ni Gob. Aris Aumentado.
Nahitabo kini tungod siguro kay nisalig siya sa kasamtangang administrasyon — nga mahatagan siya og higayon nga mobalik sa sabakan sa gobyerno, maghinulsol ug bayran ang mga sala, ug makabaton og bag-ong kinabuhi.
Kini unta ang pakadak-an usab sa mga lider sa kalungsuran. Kay kon magkahiusa sa tumong nga malungtarong kahapsay ug kalinaw, magmalipayon ang probinsya sa Bohol. Ug maangkon ang klaro nga kalambuan ug kauswagan nga dangog sa dugay nga katuigan.
Kana mahitabo usab kon anaay ‘political will’ ang mga ana-a sa gahum dinuyogan sa suporta sa katawhan ug mga nagpakabanang pundok.
