USA ka mag live-in partner kinsa gialegar nga namaligya og giingong shabu, nadakpan sa buy-bust operation didto sa Purok-5, Barangay Dao, lungsod sa Dauis niadtong Dominggo mga alas 10:04 sa gabii.
Ang mga suspetsado giila nga sila si Glenn Aranas, 43 anyos, way trabaho ug kapuyo niini nga si Jures Parsakala, 47, lumad nga lumolupyo sa Purok 5, Brgy. Mayacabac, Dauis, kasamtangang nagpuyo sa Purok-1, Brgy. Dao, Dauis.
Ang ginsakpan sa Dauis Drug Enforcement Unit nagpahigayon og anti-illegal drug operation sa maong dapit.
USA ka polis poseur-buyer nipalit og usa ka medium size nga putos nga giingong shabu kantidad og P6,000.
Pagtunol pa sa maong putos dali kining gisikop.
Laing nakuha gikan sa ilang posisyon ang tulo ka mga dagkong putos nga may sud gituohang shabu.
Ang nabawing gituohang drugas gibanabanaang motimbang tanan ngadto sa 20 gramos ug may Standard Drug Price nga mokabat ngadto sa P136,000.
Gitakdang pasakaan og sumbong ang mga dinakpan sa paglapas sa Akta Republika 9165 kun Comprehensive Dangerous Drugs Act of 2002 didto sa piskaliya. ( ALAN ANDY NALZARO DALAGAN )
