NALUMOS-PATAY ang usa ka mag-uuma samtang namukot sa Capayas Dam, P3, Brgy. Calanggaman lungsod sa Ubay hapon sa adlawng Biernes.
Giila ang biktima nga usa ka Donato Dupit, Jr. y Moneza, 27, may kapuyo, mag-uuma ug residente sa P3, Brgy. California sa samang lungsod.
Taho nga nahipos sa kapolisan pinaagi sa Initial Report nga hinikay ni PSSg Erico M. Daigan nagkanayon nga usa ka Rochelle Quilaton ang mitaho ngadto sa buhatan sa Ubay PNP kabahin sa maong insidente.
Gilayon gihimoan kini og retrieval operation sa hiniusang bahan nga gilangkoban sa kapolisan, Coastguard Ubay, MDRRMC ug TARSIER 117.
Ang pasiunang imbestigasyon nagbutyag nga sa may alas-4:00 ang takna sa hapon sa maong adlaw, ang biktima uban sa iyang mga kahigalaan ang nangisda sa maong dapit pinaagi sa pukot.
Matud pa, paglabay sa mga 30 minutos, kapin kun kulang, ang biktima nangayo og pakitabang sa iyang kaubanan apan ang naulahi napakyas sa pagtabang sa nauna kay pareho silang dili makamao molangoy hangtud ang biktima mitidlom ilawom sa tubig ug naanod.
Hinuon, mga pasado alas-otso ang takna sa gabii naugkat ra ang patayng lawas sa biktima human usab sa maong retrieval operation. ###REYLAO/Wenny Reyes
(Hulagway gikan sa Flickr account ni Paolo Garcenila)
