PATAY ang usa ka senior citizen nga pasahero samtang 19 ang nangaangol, uban niíni grabe dihang usa ka Mountain Eagle Trans bus nga giingong nawad-an og brake, miungad sa bakilid nga bahin sa man-made forest sa nasudnong dalan didto sa Brgy. Villa Aurora, lungsod sa Bilar mga alas 9:30 sa buntag kagahapon, Disyembre 8.
Ang namatay giila nga si Erlinda Anub, 64 anyos minyo, usa ka vendor, taga Brgy. Inaghuban, lungsod sa Pilar.
Samtang ang mga nangaangol nga gipanghatod sa Gov Celestino Gallares Memorial Hospital sa siyudad sa Tagbilaran nailhan nga sila si Vallerie Beth Sapong, 21 anyos, taga Tagbilaran, Way Val Sapong, 1, Tagbilaran, Marebeth Anicoy, 20, Carmen, Cemprecia Lubas, 65, Bilar, Cherry Sayen, 37, Bilar, Urcibio Galamiton, 64, Sierra Bullones, Jhul Hommer Bajulga, 27, Sierra Bullones 8. Layoy Lou Lubas, 55, Bilar 9. Edna Ancog, 40, Bilar 10. Rachel Mae Alvarez, 30, Carmen.
Samtang ang gidala sa Carmen District Hospital, 1. Jema B. Madronero, 50, Carmen 2. Christine Joy Cagas, 20, Bilar 3. Jeresha L. Rubilla, 23, Zamora, Bilar 4. Roxan M. Rosales, 27, Bicao, Carmen 5. Jovito Libres, 60, Bagacay, Talibon 6. Lorena Baldom, 45, Owac, Bilar 7. Aquino Malaran, 52, Villa Aurora, Bilar.
Sa Ace Hospital, Tagbilaran, 1. Oliver Ancog, 58, taga Owac, Bilar ug sa Ramiro Hospital ( 1) Gemma Sumampong, taga Bonifacio, Bilar.
Sigun ni PSSG Mark Cabusao sa Bilar Municipal Police Station nga samtang ang maong bus nga nakarehistro ni Alfonso Unajan, may plate number GXL 189, may body number 1121C, gimanehoan ni Joseph Ratilla y Salem, 39, minyo, molupyo sa Brgy. La Hacienda, lungsod sa Alicia ug sakay ang 25 ka mga pasahero, nagdagan gikan sa Abachanan, Sierra Bullones padung sa direksiyon sa siyudad sa Tagbilaran. Dihang pag-abot sa maong dapit, giingong nawad-an og brake hinungdan nga gipidpid sa kilid nga bahin sa tiilan sa bungtod.
” Na-malfunction ang brake ug aron di mahagbong ang bus sa pangpang, gipidpid sa drayber sa kilid nga bahin, ” butyag ni Cabusao nga nahinabi sa BBDN.
Matud ni Cabusao nga tungod sa kalit nga hitabo, kadaghanan sa mga pasahero nangapakong hinungdan sa grabeng pagkaangol niini ug niresulta sa kamatayon ni Anub.
Daling ningresponde sa maong dapit ang Bilar Search and Rescue Unit, Tarsier 117, MDRRMO-Loboc, MDRRMO- Sevilla ug MDRRMO-Batuan.
Gikustodiya na sa Bilar PNP ang maong drayber samtang ang tag-iya sa maong bus nga sakay usab niadtong higayona nagpasalig nga maoy mangabaga sa galastuhan sa mga biktima. (ALAN ANDY NALZARO DALAGAN)`
