A |
ng gahum sa ilegal nga drugas padayong nagguba sa kaugmaon ilabina sa kinabuhi sa kabatan-onan.
Gani dinhi sa lalawigan sa Bohol, naglaroy-laroy gihapon ang maong guinadiling tambal.
Usa ka magbabalaod gusto nga himuong ‘mandatory’ o pugsanay ang pag-‘drug tests’ sa mga ‘celebrities’ o sikat nga mga personalidad sama sa mga artista.
Mao kini ang sugyot ni Surigao del Norte 2nd District Rep. Robert “Ace” Barbers nga ipailawom una sa drug testing ang mga artista sa dili pa mopirma og kontra alang sa ilang proyekto.
Gusto niini nga ang mga producers, directors lakip na ang mga TV stations himuong rekisitos ang pagpa-drug tests sa mga artista sa dili pa nila dawaton.
Nigawas ang maong plano human ang aktor nga si Dominic Roco nadakpan sa usa ka buy-bust operation, lakip ang 4 ka mga kauban niini. Si Dominic anak sa sikat nga aktor nga si Bembol Roco.
“The past several years meron pong mga inidolo ng bayan na mga artista na talagang nasangkot sa ilegal na droga. Sa aking palagay, ito ay makakaimpluwensiya sa ating mga kabataan,” matud ni Barbers.
“Sa aking paniwala, siguro dapat sa industriya ng pelikula e siguro dahil ito ang malapit sa puso ng tao…siguro dapat malinis ang kanilang mga imahe at hindi sangkot sa masamang bisyong ito.”
Ang aktor ug karon usa na ka magbabalaod nga si Sen. Robinhood “Robin” Padilla niingon nga uyon siya sa maong lakang apan dili “obligahon” nga magpa-drug tests. Gusto niini nga “boluntaryo” o sa gusto lang magpa-drug tests.
Ang sikat nga aktor ug karon Leyte 4th District Rep. Richard “Goma” Gomez uyon usab sa maong sugyot apan gusto niya nga dili lang sa mga artista i-require ang drug tests apan lakip sa ubang sektor.
Ang uban usab niingon nga puslan nga gisugyot kini, mas maayo nga tanang empleyado sa gobyerno ilabina ang mga politiko maapil sa maong drug tests.
Si Barbers, kinsa maoy tsirman sa House Committee on Dangerous Drugs, niingon nga siya kada tuig nagpa-drug tests aron ipakita nga iyang gipuy-an ang iyang gisulti. Giaghat usab niya ang iyang mga kaubang magbabalaod nga mahimong ehemplo ug boluntaryo nga magpa-drug tests.
Sakto kini ilabina ang “Public office is a public trust.”
