TAGBILARAN CITY, Bohol, September 29 (PIA)–Ang Maritime Industry Authority (MARINA) Regional Office VII gikatakdang magbukas sa ilang extension office sa lungsod sa Panglao.
Kini human misanong si Panglao Mayor Edgardo Arcay sa hangyo ni MARINA-7 Regional Director Engr. Emmanuel B. Carpio alang sa usa ka office space nga gamiton isip ilang extension office sa lungsod.
Gibutyag ni Arcay nga ang maong extension office mahimutang sa karaang municipal building sa Panglao, atubangan sa simbahan sa St. Augustine.
Atol sa iyang courtesy visit niadtong Setyembre 26, 2022, gituki usab ni Carpio sa mayor ang ilang plano nga magbutang og maritime training center kon makahatag ang lungsod og yuta nga tukoran sa 4-storey building.
Si Arcay, kanhi kapitan sa barko sa wala pa mosulod sa politika, nipasalig dayon nga andam silang mohatag sa gikinahanglang yuta aron matuman ang plano sa MARINA.
Dako ni nga tabang sa mga Bol-anon nga seafarers kay makadaginot sila sa pagproseso sa ilang mga rekisitos kay ang extension office makatabang sa mga local seafarers sa pagproseso sa ilang mga certificates ug license nga dili na kinahanglang mobiyahe pa sa Sugbo o ubang opisina sa MARINA.
Si Carpio nipadayag sa iyang pasalamat kang Arcay sa pagtabang sa MARINA sa tumong niini nga mapaduol ang serbisyo sa ahensya ngadto sa katawhan. (ecb/PIA7-Bohol)
