PINAAGI sa usa ka sertipikasyon gikan sa Department of Interior and Local Government (DILG) dinhi sa Bohol, opisyal na nga gitahud sa ahensya isip incumbent nga mayor sa Alicia si Cesyl L. Balahay.
Sa usa ka sertipikasyon nga gipetsahan niadto pa’ng Agosto 4, si DILG Bohol Provincial Director Jerome G. Gonzales midason nga sa prinsipyo sa succession, ang DILG mitahud sa pagpahiluna kang Balahay, nga napili nga Bise Mayor isip mao nay mayor sa Alicia, subay sa mga records nga gitipigan sa Provincial DILG.
Si Balahay, mingsaka sa pwesto isip mayor sa Alicia, human wala mopakita ang mingdaug nga napili na unta nga mayor, si kanhi mayor Marnilou Ayuban.
GIKIHA NA DAAN
Nasayran usab sa BBDN, nga si Ayuban, uban sa pipila ka kanhi sakop sa Sangguniang Bayan sa Alicia,gikiha diay ug gani, nahukman na nga sad-an sa usa ka kaso nga criminal, niadto pa nga Hulyo 1, 2016.
Ug kon ngano nga nakalusot sa iyang Certificate of Candidacy niadto’ng katapusang pinili-ay, kana tungod kay may pag-apelar pa nga nagpadayon sa hukom batok sa kanhing mayor.
Na-igo si Ayuban ug mga kaubanan nga gipaila nga sila Eusebio Ayuban Jr., Paul B. Villas, Exequiel Madrinan, Nonito A. Dapiton, Basilidisa G. Doydora, Emilio T. Tan ug Alfredo Lluvido, sa paglapas sa Section 3 sa Anti Graft and Corrupt Practices Act o RA 3019.
Niadto pa nga tuiga, nahukman na nga ang mga gireklamo, mabilanggo sulod sa unom ka tuig ug 1 ka buwan, gidid-an na sa paghupot og pwesto sa serbisyo sa goberno ug pabayron sa P100,000 isip moral nga danyos ngadto sa kihante nga si Jonathan Puracan ug pabayran ang mga sweldo nga dawaton unta sa naulahi kon gitugotan pa nga makalingkod isip hulip sa nabakante nga pwesto sa SB sa lungsod.
MIAPELAR SA KASO
Sa desisyon, mipasaka og motion for reconsideration ang mga nahukman nga sad-an ug miapilar sa kaso pinaagi sa Notice of Appeal pinetsahag Oktubre 17, 2016.
Apan gini gibasura sa Court of Appeals niadtong Marso 12, 2019, ug ang Motion for reconsideration, gisalikway usab sa Court of Appeals sa resolusyon niini niadtong Disyembre 13, 2019.
Sa lanat sa kaso, wala na ma-abti pa sa desisyon sila Madrinan ug Dapiton, kinsa namatay ug dili na ikapataw kanila ang hukom.
GIPASAKA SA KORTE SUPREMA
Mindangop na usab ang mga akusado kauban ni Ayuban ngadto sa Korte Suprema (SC), sa panghinaut nga makakuha na og pabor nga hukom.
Apan, laing hukom sa SC, gibasura gihapon ang ilang Petisyon sa Review on Certiorari, apan nakita sa SC nga walay bag-ong pruweba nga makapabalit-ad sa unang mga hukom, ug kining desisyon sa Korte Suprema, nahimo nga final ug executory niadtong Oktubre 14, 2020.
NATALIGAM-AN ANG RTC?
Duha ka buwan human niadto, sila’ng Ayuban Jr., Villas ug Ayuban mingpasaka na usab og laing motion for leave to file attached second motion for reconsideration sa Korte Suprema, samtang sa napagawas na nga arrest warrant niadtong Nobyembre 23, 2021.
Human sa pusot-pusot nga mga motions nga giduso sa mga akusado ngadto sa Korte Suprema, gibutyag sa Regional Trial Court nga walay pagbabag nga ilang nadawat sa unang desisyon, busa paglansang sa kahumanan sa kaso, sa desisyon nga gipagawas niadtong Hunyo 7, 2022, o human na sa piniliay sa 2022, sa katapusang higayon, gisalikway sa Regional Trial Court Branch 51 7th Judicial Region sa Carmen pinaagi ni Presideng Judge Jorge B. Espinal ang mga mosyon.
Sa hukom ni Espinal, gikanselar na niini ang pyansa ug gimandu na sa korte ang pagdakop kang Ayuban Jr., Villas ug Ayuban ug pagbalhog na niini sa Leyte Regional Prison sa Abuyog Leyte aron alagaran ang ilang mga sentensya. (BBDN)
