MGA kasong kriminal ug administratiba ang gipasaka kagahapon nila ni Dauis Bise Mayor Marietta Sumaylo ug Dauis Liga ng mga Barangay President Josever Sumaylo batok kang Mayor Roman Bullen sa lungsod sa Dauis didto sa Ombudsman Visayas kalabot sa gipasangil niini nga druglord.
Si Manlalaban Popot Marapao, abogado sa magtiayong Sumaylo, nibutyag nga ang mga kasong ipasaka batok ni Bullen mao ang kalapasan sa Grave Oral Defamation, tulo ka counts sa libel on radio ug administrative cases nga kalapasan sa Republic Act 6713 o ang Code of Conduct and Ethical Standard for Public Officials and Employees ug Grave Misconduct.
Uban sa ilang mga pahayag ang duha ka mga complainant nihural niadtong Huwebes atubangan ni Provincial Prosecutor Nilo Ahat sa dili pa nila isang-at ang reklamo didto sa buhatan sa Ombudsman Visayas sa dakbayan sa Sugbo.
Parehas nga kaso ang ipasaka batok kang Bullen apan managbuwag ang Bise Mayor nga nangayo og moral damages nga moabot og P40 milyones ug laing exemplary damages nga P4 milyon. Samtang ang ABC President nangayo usab og moral damages nga moabot og P20 milyones ug P2 milyon pesos nga exemplary damages. Moabot tanan sa P66 milyones.
Nag-ugat ang kasong ipasaka human gipasangil ni Bullen atol sa iyang 100 days report niadtong Oktubre 10 nga druglord si Bise Mayor Sumaylo ug ang bana niini nga si Josever. ( AND )
