Gitinuod ni Mayor Ongie Grace Bernales-Lim ang iyang saad nga iyang dalhon ug ipaduol ngadto sa mga katawhan sa lungsod sa Mabini ang serbisyo sa gobyerno.
Kabahin sa iyang unang 100 ka adlaw sa pagpangutangdanan, gipangunahan sa first termer local chief executive sa Mabini ang labing unang CivAc kon Civic Action sa lungsod ,Oktobre 10, 2022, didto sa Sitio Pasto, Barangay San Isidro.
Kauban ni Gobernador Aris Aumentado ug mga sakop sa Sangguniang Bayan nga gipangulohan ni Bise Mayor Myra Fostanes Colis, gidala ni Mayor Lim ang nagkalain-laing serbisyo sa LGU ngadto sa mga lumolupyo sa maong barangay.
Kini naglakip na sa serbisyong medical ug dental, agricultural services sama sa paghatag og mga bitamina sa kabaw ug baka, libreng tuli ug tupi ingon man paghatag og sungkod ug walker pa nga gikalipay sa mga residente.
Gawas sa Barangay San Isidro, ang mga residente usab sa Barangay San Roque, San Jose ug Paraiso ang naka benepisyo sa gihimong CivAc.
Human sa gihimong pagtambong sa pay-out sa cash aid alang sa mga rice farmers didto sa lungsod sa Ubay, wa usab pakyasa ni Gobernador Aris Aumentado ang pagtambong sa maong kalihukan didto sa Mabini diin iyang gidala ang mga tinogyanan sa Provincial Health Office, Provincial Agriculture Office ug Provincial Veterinarian aron paghatod usab og mga serbisyo.
Giturn-over sa provincial government ang mga bio shredder ug mga ginalon nga molasses alang sa San Isidro Dairy Farmers ug ang pay-outs alang sa mga BHWs.
Dako ang pagpasalamat ni Mayor Onjie Lim kang Governor Aumentado sa way pagduha-duha ug pagsanong sa iyang mga hangyo bisan pa sa hamobong pagpa-abot niya sa katuyu-an para mas mapalapdan pa ang serbisyo nga madalit sa katawhan sa Mabini.
Gikahimamat sa gobernador ang mga katawhan sa Mabini diin nakita pud niya ang kahimtang sa maong barangay. (rvo/Rey Tutas)
