NAKADAWAT og pagpanghulga sa iyang kinabuhi si Dauis Mayor Roman “Amoi” Bullen sa wa pa mailhing tawo bag-ohay pa lamang.
Matud pa usa ka puting papel ang gibutang sa ilang gate ug dunay nakasuwat nga, “Moi, Isang bala ka lang.” Gawas niini gipatabanan pa kini og usa ka bala sa gituohang kalibre .45 nga armas.
Kini ang gikompirma ni Bullen dihang nahinabi sa radyo. Apan luyo niining tanan wa mahadlok si Bullen sa maong death treat.
Sigun ni Bullen nga niadtong Bernes mga alas 9:00 sa gabii sa dihang niabot ang paskin sa iyang balay didto sa Barangay Mariveles.
Nagkanayon ang mayor nga unang higayon sa iyang kinabuhi nga makadawat og hulga apan wala siya nibati og kahadlok sanglit wala man usab kini’y gihimong dautan.
Sa pagkakaron, wa pay tawo nga matumbok ni Bullen nga nagsugo ug mismong nagbuhat sa pagpadala niining maong paskin.
Human nakadawat sa maong hulga, gipa-blotter sa mayor sa buhatan sa mga kapolisan ang maong death threat ug giabisohan usab kini nga magpadugang og polis escort.
Gibutyag usab niya nga bisan wala siya mahadlok sa maong bahad apan dili usab angayan nga mokompiyansa ug gani plano niining moduol ngadto kang Gobernador Aris Aumentado aron ipasabot ang hulga nga iyang nadawat sa wa mailhing tawo. ( AND )
