Anaay mensahe si Gob. Aris Aumentado ngadto sa mga tawo nga gustong lawgawon ang iyang administrasyon, ilabina ang iyang mga kritiko ug karibal sa politika. |
Ang anak nga Aumentado sa Segundo Distrito ilabina nahimo kining kongresista sulod sa tulo ka termino, gusto pamatud-an nga dili mauwahi sa kalambuan ang maong distrito.
“Mubo (ubos) ra mo og tan-aw sa Second District. Sleeping giant ang Second District… Wait and see lang,” matud ni Gob. Aris kaniadtong Martes atol sa ceremonial launching sa Dagohoy Solar Power Project (DSPP) nga usa ka proyekto sa Department of Energy (DOE) ug pagadumalaon sa PetroGreen Energy Corporation (PGEC), usa ka solar power company.
Ang Segundo Distrito gibiay-biay nga maoy pinaka-pobre sa tulo ka distrito sa Bohol.
Matawag nga nabiyaan usab ang maong distrito sa dihang lahi na ang nisunod nga mga gobernador human sa iyang amahan nga si Erico Boyles Aumentado, kinsa nahimo usab nga kongresista.
Kon ana-a may mga proyekto ug programa nga gihatag gikan sa nisunod nga duha ka gobernador, dili pareha sa ilang gihatag sa distrito nga ilang gipuy-an.
Karon nga si Aris mao na ang gobernador ug ang iyang kapikas nga si Van-van Aumentado maoy nisunod kaniya isip kongresista, dayag gayud nga mas suportahan nila og ayo ang Segundo Distrito.
“Lahi ang set up sa 1st ug 3rd District. Ang second district ang bulahan,” matud sa gobernador.
“Bulingon ang ilang tan-aw sa mga tawo sa 2nd District. Pasagdan ra na nato sila. Ato na silang i-surprise,” ni Aris pa.
Una ng niingon si Aumentado panahon sa pagpangampanya sa bugnong lugaynon kaniadtong Mayo 9 diin siya ang nidaug, nga iyang himuong “industrial zone” ang Segundo Distrito ilabina “congested” o pi-ot na kaayo ang Tagbilaran City.
Hinuon ang batan-ong gobernador niingon nga sa ubang kalungsuran sa 1st ug 3rd District niya pasudlon ang ubang investors aron malipay ang tanan. Walay magmahay o magselos.
Sa tono ni Aris, iyang pa-abante-hon ang Segundo Distrito pinaagi usab sa liderato ni Van-van.
