TAGBILARAN CITY, Bohol, Jan 3 (PIA) –Ibaligya sa P20.00 nga us-os sa presyo sa susamang matang sa isda nga gibaligya sa merkado, ug pagpugong sa nilangkob nga pag-angkat sa isda ang duha sa mga responsibilidad sa mga lab-asera nga ming-apil sa Fish Buy-Back Program (FBBP) nga gilagdaan dili pa dugay, tali sa Kapitolyo ug sa mga institusyon, kahugpungan sa mananagat ug mga komprador sa isda dinhi.
Kini nunot sa tumong sa kagamhanang Probinsyal nga guyoron pa-ubos ang presyo sa isda nga gidudahang natigaw tungod sa pagpalabi sa pagpaginansya sa mga anaa sa industriya niini.
Sayo ning semanaha, gilagdaan na sa Kapitolyo pinaagi ni Gobernador Erico Aristotle Aumentado ang FBBP diin nahilakip sa mga partido nga nasangunan sa pagpadagan sa programa ang Bureau of Fisheries and Aquatic Resources (BFAR), Land bank of the Philippines, napulo ug pito ka sakop sa kahugpungan sa mga lab-asera ug napulo la kahugpungan sa mga mananagat.
Sa nasampit nga Memorandum of Agreement, gitugot sa mga mangingisda nga sakop sa kahugpungan nga ibaligya ngadto sa kagamhanang Probinsyal sa dili momenos sa katunga sa iyang kuha nianang adlawa, ug bayaran usab kini dayun sa kagamhanan pinaagi sa GCash pinaagi sa Buhatan sa Mamahandi sa Lalawigan.
Gitando usab sa mga kahugpungan sa mga mangingisda nga magsubay sila sa gikasabutan nga farm gate price sa isda.
Sa MOA, sa katungod sa mga lab-asera, gawas nga ilang gisaad nga ilang ibaligya sa mga ubos nga presyo ang ilang isda, ilang ipahibaw sa OPA, kinsa maoy principal nga magpatuman sa proyekyo, kn asa ug kang kinsa nila ibaligya ang ilang stocks aron kapugngan ang dinaghang pag-angkat sa usa lamang ka lab-asera aron ibaligya lang gihapon.
Aron usab mahibaw-an kon may isda ba nga gitago, matag dunggu-anan sa isda, may ipahimutang nga inspector ang Kapitolyo.
Sa laing bahin, kadtong mga lab-asera, ug mga sakop sa kahugpungan sa mga mangingisda nga nakaapil sa FBBP, makahuwam sila sa LandBank of The Philippines sa soft loans gikan sa Department of Agriculture Agriculture Competitiveness Enhancement Fund sa 2% nga interest matag tuig ug bayaran sulod sa 5 ka tuig.
Ang BFAR usab natahasan sa paghatag og logistical support sa programa, gawas pa sa pagtanyag ug suporta nga teknikal alang sa programa ug pagtugot nga magamit ang ilang mgareefer vans subay sa availability niini.
ANg pagpahimutang sa Kapitolyo sa FBBP, subay sa lagda sa Republic Act 7581 nga nagpanalipud sa mga konsumidor sa dili makatarunganon nga presyo sa nag-unang paliton ug panginahanglan.
Kini gawas pa sa pangandoy nga tabangay ang mga gagmay nga mangingisda nga maka-ugmad sa ilang kita ug sa aron mapun-an ang kadaghanon sa isda nga mapalit aron mapakunhod ang presyo. (PIA-7/Bohol)
