PAIMBESTIGAHAN ni Gobernador Aris C. Aumentado ang Memorandum of Agreement (MOA) kaniadto tali sa Bureau of Jail Management and Penology kun BJMP ug sa kapitolyo nga way resolusyon gikan sa Sangguniang Panlalawigan.
Gihangyo ni Aumentado ang SP nga imbestigahan ang plano kaniadto ni kanhi gobernador Art Yap nga ibalik sa pagdumala sa Provincial Government ang Bohol District Jail nga kanhi Bohol Detention and Rehabilitation Center kun BDRC.
Nasayran nga usa ka Memorandum of Revocation Kun MOR ang gipirmahan niadtong December 18 tuig 2020 ni Yap tali sa Regional Director sa BJMP Region 7 nga si Jail Chief Superintendent Efren Nemeño nga nag-rebuke sa MOA tali sa Provincial Government of Bohol ug BJMP niadtong Sept. 26, 2008.
Ang MOR maoy gihimong basihan aron ibalik sa kapitolyo ang pagdumala sa BDRC nga karon BDJ gikan sa pagdumala sa BJMP.
Nasayran usab nga epektibo niadtong Enero 1 tuig 2021 ang pag-rebuke sa MOA ug pagpahigayon sa imbentaryo sa mga gamit sa maong pasilidad apan nasayran nga way natala ang Sangguniang Panlalawigan nga resolusyon nga nagtugot kang kanhi gobernador Art Yap sa pagpirma sa MOR. Gawas niini, nasuta usab nga niadtong tungang bahin sa tuig 202, dihay gi-execute nga Deed of Usucruft sa jail facility pabor sa BJMP apan wa ma-implimentar.
Nigawas usab sa gihimong pakisusi sa Commission on Audit nga way legal basis ang MOR nga gipirmahan ni Yap. ( AND )
