NANGHIMAKAK si kanhi Panglao Mayor Nila Montero sa taho nga gidesisyonan na sa Korte Suprema ang iyang kaso nga giatubang kalabot sa iyang pagtudlo og upat ka mga consultant niadtong tuig 2013.
Kini ang tubag ni Montero kalabot sa nigawas nga balita sa Business World Online News dili palang dugay.
Matud sa report sa Business World niadtong Oktubre 27, gipalig-on sa Korte Suprema ang Guilty nga hukom sa Ombudsman sa kanhi mayor sa lungsod sa Panglao sa kasong Grave Misconduct and Negligence sa paglapas sa Election Appointment Ban niadtong tuig 2013.
Dugang sa taho sa Business World sa 15 ka pahinang desisyon nga dunay petsa nga Hulyo 27 ug gipublikar niadtong Oktubre 20 ang Supreme Court Second Division niingon nga sakto ang hukom sa Ombudsman nga si Montero adunay gidapigan ug in bad faith sa dihang nagbutang siya og upat ka mga consultant nga napildi isip mga kandidato sa piniliay.
Sa pakighinabi sa radyo, si Montero kinsa kasamtangang Konsehal karon sa Panglao miingon nga anaa pa sa Sandiganbayan ang kaso sanglit niduso na siya og Motion for Reconsideration kun MR niadtong niaging Lunes.
Apan sumala sa kanhi mayor nga kun ibasura sa Sandiganbayan ang Motion for Reconsideration iyang isaka kini ngadto sa Supreme Court.
Kahinumduman nga niadtong tuig 2018 gimando sa Ombudsman ang dismissal kang Montero human siya namatud-ang sad-an sa Grave Misconduct usa ka rason alang sa pagdili og hupot og katungdanan sa publiko pagkahuman gisaka ang kaso sa Sandiganbayan.
Sa pagsugod niya sa pangatungdanan niadtong Hulyo 1, 2013, gikuha ni Montero si Noel Hormachuelos isip municipal administrator, Danilo Reyes isip public information officer, Fodulan isip Public Employment Service Office Coordinator ug Penales isip consultant sa mga Infrustracture and Engineering Services.
Gi-sentensyahan si Montero og napulo ka tuig nga pagka priso ug 1.3 milyon pesos nga multa alang sa iyang Civil Liability.
Gimandoan si Montero nga bayran og 1.3 milyon pesos ang LGU Panglao alang sa mga sweldo ug benepisyong gibayad ngadto sa upat ka mga job order personnel apil na ang legal nga interest.
Gipalig-on usab sa Anti-Graft Court ang Hold Departure Order kun HDO batok ni Montero kinsa kasamtangang konsehal karon sa Panglao. ( AND )
