PATAY ang duha ka mga drayber human usa ka motorsiklo kansang drayber giingong lango aa bino, aksidenteng nisungag sa pagkabangga sa gikasugat nga tri-cab sa nasudnong dalan didto sa Brgy. Tocdog Dacu, lungsod sa Loay mga alas 7 ang takna kagabii, Disyembre 4.
Ang mga biktima giila nga sila si Fernando Labial, 55 anyos, minyo, taga lungsod sa Buenavista ug Reygie Abucejo, 30, ulitawo, molupyo sa Luyo, Brgy. Banaba, lungsod sa Garcia Hernandez.
Sigun ni PSSG Donald Curan sa Loay Municipal Police Station nga sa nahinabi sa BBDN ug sa Bee Sunrise News nga ang TVS nga tricab o mas nailhan nga bao-bao kolor green nga gimanehoan ni Labial, nagdagan gikan sa lungsod sa Lila padung sa direksiyon sa lungsod sa Loay. Samtang ang Yamaha Sniper 150 kolor itom nga motorsiklo nga gimanehoan ni Abucejo nagdagan sa sugat nga direksyon gikan sa Loay padung sa Lila.
Dihang pag-abot sa maong dapit, ang drayber sa Yamaha Sniper kinsa giingong ubos sa impluwensiya sa ilimnong makahubog, nikawat og linya hinungdan nga nibangga sa TVS.
“Pag-abot sa area, ang drayber sa Sniper nga gituohang under the influence of liquor, nikawat og linya hinungdan nga nagkabangga silang duha, ” butyag ni Curan.
Patay diha-diha dayon si Labial gumikan sa grabeng angol nga nahiagoman sigun sa deklarasyon ni Dr. Julius Romero, municipal health officer sa maong dapit, gumikan sa kakusog sa impact sa pagkabangga.
Samtang si Abucejo gideklarar nga dead on arrival sa mananambal sa Gov Celestino Gallares Memorial Hospital.
Dugang ni Curan nga pulos nangadanyos ang duha ka mga sakyanan. (ALAN ANDY NALZARO DALAGAN)
