DUHA ka tawo ang nangaangol human usa ka motorsiklo ug traysikol nagkabangga sa nasudnong dalan didto sa Brgy. Buenos Aires, lungsod sa Carmen mga alas 7:20 sa buntag kagahapon.
Ang mga biktima giila nga sila si Apolinario Balansag, 65 anyos, minyo, drayber sa motorsikllo ug Shirley Alto, 39, minyo, pulos taga Brgy. Kauswagan, lungsod sa Trinidad.
Sigun sa pakisusi sa Carmen Municipal Police Station pinaagi kang PSSg Rustico Bitasolo Jr. nga samtang usa ka private nga traysikol nga gimanehoan ni Wilfredo Carion, 64, minyo, taga Brgy. Buenos Aires, Carmen nagdagan padung sa direksiyon sa lungsod sa Batuan, gisundan sa usa ka Yamaha Mio 125 nga motorsikllo nga gimanehoan ni Balansag uban sa íyang backrider nga si Alto. Dihang pag-abot duol sa atubangan sa Buenos Aires Elementary School, nikalit og U-turn ang maong traysikol kay mo-drop og estudyante sa maong tunghaan. Hinungdan nga nagkabangga ang duha ka mga sakyanan.
“Nakabantay si Balansag hinungdan nga nakalikay apan naigo gihapon ang manobela,” butyag ni Bitasolo.
Na-kras ang maong motorsiklo ug pulos nangaangol ang mga biktima.
Daling gihatud ang duha sa Cong. Simeon Toribio Memorial Hospital. Apan nakagawas na kay minor lamang ang mga angol niíni.(ALAN ANDY NALZARO DALAGAN)
