Naipit sa tunga ang OGAR Patayg Oras Luoy pud ning Office of Governance, Accountability and Review (OGAR) usa ka buhatan nga gitukod ni Gob. Erico Aris Aumentado aron susihon ang mga binuhatan sa nagkalain-laing mga buhatan ug mga kawani sa kapitolyo.
Sa dihang una kining giporma, ang kasagarang reaksyon mao nga gitukod kini aron gukdon ang mga kontra sa naglingkod karon uban kang Gob. Aris, Bise Gob. Victor Balite ug ang mayoridad sa hunta probinsyal.
Kining maong paglantaw sa OGAR misamot tungod usab kay gipangulohan kini sa kanhi Cabinet Secretary ug mayor sa lungsod sa Maribojoc nga si Leoncio Evasco Jr. Alang sa mga tigpaniid ug dumadapig ni Aumentado, nagpaabot na lag adlaw ang ilang mga kaatbang sa di pa magbansiwag ang mga kaso batok kanila.
Apan lima na ka bulan sukad natukod ang OGAR apan wa pa gihapoy nabalita nga bisan usa ka kaso nga gipasaka. Og tungod niini, nagsugod nag alingasa ang mga naghinam-hinam.
Kini ilabina kay nakaako pa usab og panghagit ang mga dumadapig sa gipulihan nga administrasyon kon asa pa ang mga kaso nga gipanghambog batok kanila.
Sa pipila ka higayon nga akong gikahinabi si Evasco ug pipila ka kauban, napulsohan nako ang ilang kahimtang. Wa malipay kanila ang mga nagtuo nga ang OGAR tinuyo alang kanila. Sa pikas bahin, wa sab malipay karon ang ilang mga kaatbang kay gusto na nga sugdan ang pagpanit kanila sa publiko.
Apan sa mga nasayod sa proseso sa kaso, di kini sayon buhaton. Labina kon ang tuyo mao gayud ang pagpabilanggo sa mga nangawat ug nagpahimus sa kaban sa katawhan. Sayon ra ang pagpasaka og kaso aron dunay balita nga ibaligya ang media. Lahi na nga sugilanon ang pagpalig-on sa kaso aron magtingkagol sa prisohan ang mga sad-an.
Nia kita ning maong eskina karon. Sa klarong pagkastorya, naipit sa tunga ang OGAR.
Samtang gilarawan ang mga kanhi namunoan nga ngil-ad ug naghitak ang ilang anomaliya, klaro usab sa mga naglingkod sa OGAR nga aduna silay katungdanan sa kamatuoran.
Sukwahi sa gituhoan sa kadaghanan, di kini hinagiban sa pulitika nga gamiton lang sa pagbuling-buling ug paguba sa mga kontra.
Usa kini ka buhatan nga ang katawhan, og di ang nagbutang kanila sa katungdanan, maoy tinuod nga alagaran. Gani, giklaro sa pipila kanila nga di sila modawat og sweldo apan usa kini ka boluntaryo nga kawsa aron patubagon ang mga abusado ug tul-iron ang pangagamhanan. Dinhi kasagarang masayop ang mga kritiko sa OGAR.
Apan ipadaplin lang usa nato kini ug uban pang mga hinungdan. Isip usa ka lalawigan nga kusog ang impluwensya sa relihiyon, di pud tingali maayo nga sugdan nag bitay ang mga nakasala sa panahon sa pasko. Sa ispiritu sa kasaulogan, lugwayi usa ang pisi.
