Ang pagkatukod sa OGAR usa ka ebidensya nga ang kasamtangang Administrasyon tinud-anay ug sinsero gayud ang pagpangalagad.
Bisan siguro ang ‘ubang sakop’ sa Opposisyon lakip ang ilang mga dumadapig, makaingon nga sinsero gayud si Gob. Aris Aumentado sa iyang panaad nga limpyuhon ang Kapitolyo batok sa mga kahiwian ug korapsyon.
Sa mga Facebook posts sa negosyanteng si Emmanuel “Willy” B. Ramasola, kinsa usa sa mga Board of Consultants sa OGAR, nag-anam-anam na og kautingkay ang mga kadudahang transaksyon sa niaging pamunoan.
Usa sa iyang lima (5) kuno ka Christmas wishes nga mapriso sila si “Dummy Lerio”, “Congressman Penguin”, ug “Art Corn” nga masabot nga mao sila si kanhi Provincial Administrator Ae Damalerio, Kongresista Edgar Chatto sa Unang Distrito ug kanhi Gob. Art Yap, aron motagam ug managana na ang mga kurakot sa Bohol.
Usa sa labing uwahing FB post ni Ramasola, ang gihulagway nga ‘Krusada King sa Bohol’ batok korapsyon, ang giingong dako kaayong pundo sa Primer (media team sa administrasyong Yap-Relampagos) kutob 2022, nga ana-a sa P50 milyones.
Ang mga sakop ni Yap nga sila si Kevin Damalerio ug mga kauban, nasuko kuno sa proposed budget sa OGAR nga P30 milyones.
Kon ang mga giatake ni Ramasola ang pasultihon, pulos pagpanaot ra ang gihimo sa maong usa sa mga miyembro sa OGAR.
Kon ang mayorya sa mga Bol-anon nga makita sa mga netizens ang pasultihon, ana-a sa saktong dalan ang pagkamugna sa OGAR pinaagi ni Gob. Aris. Ug ilang gisuportahan kini lakip na ang mga exposes ni Ramasola.
Ang nakanindot sa OGAR kay dili lang mga transaksyon sa niaging administrasyon ang bukiki-on apan lakip na ang mga kasamtangang empleyado sa administrasyong Aumentado-Balite nga dili magtarong sa ilang trabaho.
Ang kamatuoran ug hustisya mogawas ug modapig sa kon kinsa ang nagsulti ug nagbuhat sa makatarunganong mga lakang-opisyal sa mga pinili, ug ang katawhang Bol-anon magasaksi niini.
