Daghan ang nalipay sa balita nga anaay duha ka empleyado sa Kapitolyo nga kasuhan, apan sa laing bahin, nakugang.
Nganong nakugang man ang katawhan?
Simpol ra ang tubag: si kanhi Gob. Art Yap ug ang iyang mga kaubang politiko ang ilang gidahom nga maoy unang makasuhan.
Ana-a sa kalibog ang ubang kaigsoonan nganong mao kana ang nahitabo.
Si Yap nga maoy sentro sa giingong mga iregularidad sa Kapitolyo sulod sa tulo (3) ka tuig, diin gisundan sa iyang pagka-parot batok ni Aris Aumentado, maawahi na man hinuon ang mga kaso.
Nganong mao man kana ang nahitabo? Naglisod ba ang mga sakop sa OGAR sa mga i-kaso batok ni Yap?
Matud ni OGAR Chair Jun Evasco Jr., kasuhan si Yap.
Ug usa sa giingon ni Evasco, “dili sila magpakauwaw sa mga Bol-anon.” Buot pasabot, ilang giandam ang mga bug-at nga ebidensya maong maawahi ang pagkaso batok sa kanhi gobernador.
Ang nakalisod man gayud kay hinay ang dagan sa atong hustisya, taas ang proseso.
Apan sa anak ni DOJ Secretary Jesus Crispin “Boying” Remulla, nga nahuman ang ubang kaso sulod lang sa 75 diyas, nakaingon ang mga Pinoy nga “sana all.”
Ang gikabalak-an sa kadaghanan basin abtan og siyam-siyam ang pagpasaka og mga kaso batok ni Yap.
Niining tanan, bisan pa man kondili ang giilang “mastermind” nga si Yap ug ubang mga gamhanang mga kanhi lider ug lider ang dili unang makasuhan, isalig gihapon sa OGAR ang ilang tahas ilabina sa administrasyong Aris, sama sa pagsalig sa mga Bol-anon kaniya.
