GIAPROBAHAN na sa Sangguniang Panlungsod sa dakbayan sa Tagbilaran sa ikaduhang pagbasa ang P1.106 bilyones nga gisugyot nga annual budget sa siyudad alang sa tuig 2023.
Ang SP niaprobar sa gisugyot nga pondo atol sa regular session niadtong Biyernes.
Gipasalig ni Tagbilaran Bise Mayor Adam Relson Jala nga nagpabilin ang mga programa ug proyekto bisan pa sa pagkunhod sa National Tax Allotment kun NTA ang kanhi Internal Revenue Allotment kun IRA sa dakbayan.
Matud ni Jala nga sa administrasyon karon ni Mayor Jane Yap , gipadayon ang mga programa sa niaging administrasyon gikan ni Mayor Baba Yap diin way nawala ug nadugangan pa gani ang mga proyekto para sa sunod nga tuig. ( ALAN ANDY NALZARO DALAGAN )
