TAGBILARAN CITY, Bohol, Dec 19 (PIA) –Kon way kakulian nga mahitabo, dagway og mapundohan sa kagamhanan ang pagpahiuli sa kabaybayonan sa Alona sa Panglao.
Kini, human gibisita ni Department of Tourism Secretary Christina Frasco ang Alona ug nakabati sa laraw sa mga tag-iyahan og beach resorts nga pagpahiuli sa 700 metros kapin nga kabaybayonan nga puno sa puti nga bonbon.
Sa miaging semana, mibisita si DOT Secretary Frasco sa Alona ug uban sa mga opisyales sa Bohol pinanguluhan ni Gob Erico Aristitle Aumentado, ug opisyales sa Panglao uban ni Mayor Edgardo Arcay, lakip na ang lig-on nga kahugpungan sa Alona Beach Community, ug didto gipadayag ang laraw sa pagpahiuli sa baybay.
Usa sa mga labing gikagubtan nga hisgutanan sa Alona mao ang nagkaduol sa tau bang ilang mga establisemento, butang nga wala itugot sa balaod.
Subay sa balaod, ang labing duol nga establisemento kinahanglang anha tukoron human sa 20 metros nga lugar nga gisukod sa labing taas nga maabut sa taub.
Apan, sa labing bag-ong panahon, tungod sa nagsaka nga taub, halos tanan nga mga gitukod nga resorts sa daplin sa baybay sa Alona, wala nay 20 metros gikan sa taub, mao nga gitambagan sa mga tinugyanan sa kalikopan nga hinayhinayan na og guba kay wala na itugot.
Niini, giduso sa mga tag-iyahag resorts ang ilang laraw sa pagpahiuli sa baybayon, ug kini maglangkob sa pagsuyop og balik sa mga bonbon nga nabanlas ngadto sa kantil nga atbang sa Alona, aron ibalik sa baybay diin sila gikan.
Nasayran usab sa pagtuon nga ang mga gipanghimo nga sementado nga embankments sa Alona, usa sa mga kina-ingnan nga ang bonbon, napalid na hinuon palayo sa baybayon ug natagak sa kantil.
Matud ni Uco Trotin, kinsa representante sa Alona Beach Community Foundation, sa wala pa ang mga sementado nga embankments, inig banlas sa bawod, mokuyog ang bonbon ug madeposito sa baybay, mao nga mas minglapad ang baybayon sa Alona.
Apan sa diha nga gibutang ang embankments, inig banlas sa bawod, dalhon niini sa iyang bul-og pagbalik ang bonbon mao nga nangakankan ang baybayon, u gang bonbon, nangatagak sa kantil.
Matud pa sa mga divers sa Alona, kanhi, may 30 metros nga kantil apan karon, nimabaw na tungod sa bonbon nga nahan-ok niini.
Sa 30 metros, 22 metros na lang ang kantil ug sa ubos niini, tua nadeposito ang bonbon nga gikan sa Alona, wala nay lain pang paglaum nga makasaka og balik sa kantil, gawas kon suyopon.
Laraw sa Alona Beach Community Foundation ug sa LGU Panglao nga bungkagon ang mga embankments sa dili pa suyopon og balik ang bonbon ug ibuga sa baybay sa Alona.
Kini nga proyekto, gilantaw nga mokabat sa P70 milyones, nga gisaad usab sa DOT nga pangitaan og pundo.
Kon matuman ang rehabilitasyon, nagtuo ang mga tinugyanan sa Panglao nga masolbad na ang nagkaduol nga tau bug mahibalik ang kanhing lapad kaayo nga puti nga lapyanan sa Alona. (PIA-7/Bohol)
