GIPATUMAN sa Bohol Provincial Police Office (BPPO) ang Executive Order Number 3 ni Presidente Ferdinand BongBong Marcos Jr. nga boluntaryo nalang ang pagsul-ob og facemask sa gawas ug hawan nga dapit. Kini ang gipamahayag ni Bohol PNP Provincial Director Col. Osmundo Salibo atol sa The Capitol reports niadtong Bernes sa buntag.
Si Salibo miingon nga bisan wa pay gipakanaug nga executive order si Gobernador Aris Aumentado ilang gipatuman ang mando sa presidente nga optional ang pagsul-ob og facemask sa open spaces, non-crowded ug dunay maayong bentelasyon nga mga lugar. Ug bisan paman nga wa nay sumbanan usab nga gipakanaug ang taas nga headquarters sa PNP ilabina nga sila ang anaa sa enforcement sa IATF.
Hinoon matud ni Salibo nga kinahanglan magsul-ob gihapon og facemask sa indoor nga mga establisamento labina sa mga public transportation.
Sa dakbayan sa Tagbilaran, si Mayor Jane Yap miingon nga mosagop ang kagamhanang local sa Executive Order Number 3 ni Marcos kabahin sa pagsul-ob og facemask. ( AND )
Hulagway gikan sa CNN
