TAGBILARAN CITY, Bohol, October 10 (PIA)–Gipasigarbo ni Presidente Ferdinand “Bongbong” Marcos Jr. ang mga kalamposan sa iyang administrasyon sa unang usa ka gatos ka adlaw sa pwesto.
Sa President’s Night nga gi-organisa sa Manila Overseas Press Club (MOPC), miingon si PBBM nga nakamugna siya og “functional government” pinaagi sa pagbutang og “best and brightest” aron moalagad sa administrasyon.
Parte sa economic cluster sa administrasyong Marcos sila Finance Secretary Benjamin Diokno, Budget Secretary Amenah Pangandaman, Socioeconomic Planning Secretary Arsenio Balisacan, ug Bangko Sentral ng Pilipinas Governor Felipe Medalla.
Gikan sa 5.7 porsyento nga gross domestic product (GDP) growth niadtong tuig 2021, nakatala na og 7.8 porsyento nga GDP growth sa unang unom ka buwan ning tuiga.
Lapas pa kini sa target nga 6.5 ngadto sa 7.5 porsyentong gitakda sa economic managers sa gobyerno.
Alang sa tuig 2023, target sa Cabinet-level Development Budget Coordination Committee (DBCC) ang GDP growth nga 6.5 hangtod 8 porsyento.
“Since the campaign, unity has been our battle cry. And now that we are settling into our track and finding our pace for the six-year marathon, unity remains one of the primary driving forces in pursuing economic recovery (Sukad sa kampanya, panaghiusa ang among singgit sa gubat. Ug karon nga nagpahimutang na kami sa among agianan ug nakit-an ang among lakang alang sa unom ka tuig nga marathon, ang panaghiusa nagpabilin nga usa sa mga nag-unang pwersa sa pagmaneho sa pagpadayon sa pag-ayo sa ekonomiya),” matud pa ni PBBM.
Giseguro usab niini ang padayon nga paghimo og mga lakang aron mas mapalambo ang kinabuhi ug abilidad sa mga lungsoranon. Partikular niini ang pagpahupa sa inflation ug pagpakusog sa Piso.
Una nang miingon si Albay Rep. Joey Salceda nga ang unang 100-adlaw sa Marcos administration makonsiderar nga stabilizing period tungod sa mga nasinating global disruption nga niresulta sa pagsaka sa presyo sa lana ug kakulang sa mga suplay.
Giingong nahimong maampingon ang mga pagdesisyon ug pagtubag ni PBBM sa mga critical areas kauban na ang hisgotanan sa pag-angkat og produktong agrikultura, polisiya sa buhis ug pag-manage sa COVID-19 pandemic.
Kalabot usab sa food sufficiency, miingon si PBBM nga padayon ang paggahin sa Department of Agriculture (DA) og production inputs sa mga mag-uuma ug mangingisda.
Apil sa gihatag ang taas nga kalidad sa mga binhi ug abono, post-harvest machinery and facilities, sama sa trucks, dryers, ug mills.
Gipasigarbo usab ni Marcos ang produktibong pagbisita niya sa Indonesia, Singapore, ug US. Sa maong mga state visit, nakakuha si Marcos og $18.9 bilyon nga kantidad sa investment commitments nga gipaabot nga makamugna og 134,285 nga trabaho.
Sa iyang inaugural state visits sa Indonesia ug Singapore, nikabat sa $14.36 bilyon nga investment pledges ang nakuha ni Marcos. Apil na dinhi ang unsolicited private-public partnership (PPP) alang sa four-level elevated expressway subay sa C-5.
Samtang sa Singapore, nakakuha si PBBM og mga saad alang sa electric tricycles nga nagkantidad og $5 bilyon ug renewable energy project nga $1.2 bilyon ang kantidad. (ecb/PIA7-Bohol)
