Nahisubay ang panglantaw karon ni Gob. Aris Aumentado sa prayoridad usab sa nasudnong pangagamhanan nga himuong prayoridad ang agrikultura ug food security. |
Isip bag-ong gitudlo ni Presidente Bongbong Marcos Jr. nga tsirman sa Regional Development Council sa Central Visayas, mao usab kini ang lakang nga himuon ni Gob. Aumentado sa maong rehiyon ilabina dinhi sa lalawigan sa Bohol.
Ang maong lakang gibutyag ni Aris sa iyang mensahe atol sa ika-6 nga Regional Organic Agriculture Congress nga gihimo sa Reyna’s sa syudad sa Tagbilaran.
Si Gob. Aris bag-o lang nahuman sa usa ka study mission didto sa Korea mahitungod sa mga bag-ong kalambuan sa sektor sa agrikultura ug food security.
Niingon ang kugihan nga gobernador nga kinahanglan balansehon ang organic ug hybrid agriculture ilabina nga nagkadako na ang populasyon dinhi sa Bohol lakip na sa ubang dapit.
Anaay mga promotional efforts usab nga pagahimuon sa mga tourist hub sa Bohol alang sa dugang pagpasabot sa maong organic agriculture.
Gikinahanglan gayud ang pagpalambo sa sektor sa agrikultura aron masiguro ang seguridad sa pagkaon sa probinsya ug sa tibuok Rehiyon 7. Bubuan sa tanang suporta ang mga mag-uuma.
Sa maong nindot nga lakang ni Gob. Aris, kinahanglan usab nga ang katawhan mo-abag sa gobernador pinaagi sa pagkugi sa tagsa-tagsa ka panimalay: mananom ilabina mahal ang mga pamaliton karon sama sa utanon ug lamas.
Walay magutman kon dili lang ipalabi ang pagka-tapulan.
Kay sa pagkugi, gawas nga makatabang sa kaugalingong ekonomiya, makatabang usab sa ekonomiya sa probinsya. Kay kon abunda sa pagkaon, mo-minus ang kreminalidad ug molagsik usab ang sektor sa turismo. Hanoy ang pag-abante.
