Way sipyat nga gipatubilan ang sakyanan sa kapulisan sa Dauis sa matag higayon nga dunay gipadangat nga hangyo kabahin niini.
Kini maoy pamahayag nga giluwatan sa buhatan ni Mayor Roman Bullen sa dihang gipatubag kabahin sa isyu nga gipasupot nga matud pa ang iyang administrasyon maoy nakaingon kon nganong di na makaronda ang kwerpo sa kapulisan sa Dauis.
Tubag sa pangutana kabahin niini, gipakita sa dokumento gikan sa buhatan ni Bullen nga gihatag sa mayor ang suporta nga gipangayo gikan kaniya sa kapulisan.
Matud pa sa maong dokumento, niadtong bulan sa Hulyo, sa unang bulan sa iyang pangatungdanan, niabot ug 435 ka litro ang gikinahanglan sa kapulisan alang sa pagpatuman sa kalinaw. Tungod kay 400 ka litro ra ang gitagana gikan sa PNP, si Bullen ang mipuno sa kuwang nga 35 ka litro.
Sa milabayng bulan sa Agosto, mipuno na usab ug 90 ka litro ang mayor sa 500 ka litro nga nadawat sa Dauis gikan sa PNP.
Matud pa ni Bullen, adunay gahin ang kwerpo sa Dauis gikan sa kapulisan apan sa milabayng duha ka buwan, kanunay kining kuwangon hinungdan nga pun-an usab kini niya. Hinuon, ang tampo sa mayor base ra sa gipadangat nga hangyo gikan sa kapulisan.
“Wa sukad mibalibad (si Mayor Bullen) sa request sa PNP nga padugangan ang gasolina,” sumala pa sa iyang buhatan.
Gawas sa suporta sa gasolina, duna usay gitampo ang mayor nga bugas ug cash.
Sa talaan nga gihatag sa buhatan sa mayor, 43 ka kaso sa pagpangawat ang gikataho niadtong 2019, pito sa 2020 ug duha sa 2021. Ang naulahing duha ka tuig atol sa pagsi-aw sa covid-19.
Sukad niadtong Enero hangtud sa Septembre, walo na ka kaso nga natala sa kapulisan.
