Usa sa mga hinungdan kon nganong anaay mga proyekto ug programa sa gobyerno nga dili mahuman mao ang kakuwang kuno sa panahon sa pagserbisyo.
Usa ka pananglitan niana kon ang usa ka barangay opisyal o opisyal sa lungsod, mapildi sa sunod Piniliay. Matanggong ang iyang proyekto.
Ang nagsugdan nga proyekto o programa kasagarang dili ipadayon ilabina kon ang nipuli dili kaalyado sa politika. Subo paminawon apan mao kana ang kasagarang nahitabo.
Unsa ba’y solusyon niini?
Matud ni Sen. Imee Marcos, usa sa hinungdan nganong iyang gipaburan kauban sa ubang magbabalaod ang pag-oktaba sa barangay ug SK elections (BSKE) nga imbes karong Disyembre 5, 2022, adto na kini himuon sa Oktubre 30, 2023 kay mao ang paghimo og lakang nga mapun-an ang tuig sa termino.
Niingon si Sen. Imee nga plano nila nga pun-an og tulo (3) ka tuig ang kasamtangang tulo (3) ka tuig sa matag termino hangtud sa unom (6) ka tuig ang matag 1 ka termino.
Tumong sa maong plano kon magmalampuson nga dili mabitin ang serbisyo sa mga opisyales sa barangay man, lungsod, distrito ug probinsya o tanang termino nga tag 3 ra ka tuig.
Maayo ang maong plano kon kaayuhan sa katawhan ang gitan-aw. Apan ana-a usab kini apan kon sakyan sa mga abusadong lider ilabina kadtong mga korap.
Kon ang matag termino nga 3 ka tuig nga giingong gamay ra nga panahon gihimo sa uban nga kahigayonan aron makapangawat sa kuwarta sa katawhan, unsa pa kaha kon 6 na ka tuig ang matag termino? Mo-grabe ang kauswagan o ang korapsyon?
Ikaw, isip katawhan, uyon ka ba mga mapun-an og 3 ka tuig ang kasamtangang 3 ka tuig nga matag termino? Kon mahitabo, ang 3 ka termino mahimong 18 ka tuig.
Posible usab nga himuong tag 5 ka tuig matag termino o 15 ka tuig sa 3 ka termino.
