GIPAHAYAG sa mga tinugyanan sa Bohol Mineral Regulatory Resources Office kun BMRRO nga nimaayo ang dagan sa quarry operations dinhi lalawigan sa Bohol sukad paglingkod ni Gobernador Aris C. Aumentado sa kapitolyo.
Gipaniguro sa mga bag-ong nagdumala sa Bohol Mineral Resource Regulatory Office Kkun BMRRO nga matotokan og maayo ang saktong pagpadagan sa quarry operation dinhi sa lalawigan sa Bohol ubos sa bag-ong administrasyon ni Aumentado.
Ang BMRRO nga kanhi Bohol Environment and Management Office kun BEMO naputos kaniadto og mga kontrobersiyal labina sa panahon ni kanhi gobernador Art Yap gumikan sa mga isyo nga gikalambigitan lakip na niini ang giingong nagpaluyo sa pagpangolekta og patong gikan sa mga quarry operators pinaagi sa misteryosong Ivan nga hangtud karon wa gihapon mailhi.
Ang Hepe sa BMRRO Task Force nga si Col. Eduardo Malig-on nibutyag sa Capitol Report nga estrikto nilang gipatuman ang ordinansa sa probinsiya kalabot sa quarry operation. Gani gumikan sa pagsunod og estrikto sa ordinansa misaka usab ang koleksyon sa buhis gikan sa quarry operation.
Ang Hepe sa BMRRO nga si Engr. Anna Luisa Galisinao nibutyag nga misaka og maayo ang ilang koleksyon sa paglingkod sa bag-ong administrasyon ni Aumentado itandi sa pamunoan ni Art Yap.
Base sa ilang rekord nga mikabat og 10.9 milyon pesos ang tax collection gikan sa extraction sa mga minirals sa buwan sa Hulyo hangtud sa Nobembre ning tuiga kun asa misugod og lingkod sa kapitolyo si Aumentado kun itandi sa buwan sa Enero hangtud sa Hunyo ning tuiga nga naa lang sa 3.9 milyon pesos nga koleksyon diin naglingkod pa si Yap isip gobernador.
Tungod usab sa estriktong paagi ug pagsulod sa saktong proseso nisaka usab ang gidaghanon sa mga nadakpan ug kadtong mga nagpahigayon og illegal quarry sa pagsugod sa Aumentado administration niabot sa 22 ang nadakpan. Nitaas kini itandi sa usa lang ka nadakpan sa nilabay nga lima ka buwan diin si Yap pa ang nagdumala sa probinsya.
Nidako usab ang kantidad sa ilang natala nga mga fines and penalties sa panahon ni Aumentado administration nga mikabat sa P259,000 gikan sa Hulyo hangtud sa Nobiyembre itandi sa P35,000 lang sa nahibiling lima ka buwan ni Yap.
Una nang gibutyag ni Aumentado sa iyang 100 days sa serbisyo nga sud lang sa tulo ka buwan ni-triple ang koleksyon sa quarry permit fees gumikan sa pagkawagtang sa Ivan sa kapitolyo nga giingong mangolekta of 30 porsiyento nga kickback sa mga quarry operators. (AND)
