PATAY na nga nahidangat sa tambalanan ang usa ka retiradong magtutudlo human madasmagi og motorsiklo sa nasudnong dalan, P3 Brgy. Calanggaman lungsod sa Ubay mga alas-4:45 ang takna sa sayong buntag niadtong Mercoles.
Giila ang biktima nga usa ka Vilma Boysillo y Abayabay, 67, dalaga, retired teacher ug nagpuyo sa P1 sa samang barangay.
Samtang ang drayber sa nakadasmag nga motorsiklo nailhan nga usa ka Daryl Mendez y Cuago, 24, may ka-live-in, gas station pumpboy ug residente sa P5, Brgy. Tipolo, Ubay.
Gimanehoan niini ang motorsiklong Rusi RMP 110 color itom ug blue, walay plaka.
May backrider kini nga usa ka Rosly Golosino y Boiser, 26, kapuyo sa maong driver.
Ang duha nakaangkon usab og minor injuries.
Ang pasiunang imbestigasyon nagbutyag nga ang motorsiklo nga matud pa kusog ang dagan, gikan sa Dakbayan sa Tagbilaran paingon na pauli sa Brgy. Tipolo.
Pag-abot sa dapit nahitaboan, aksidente kining midumbol sa biktima nga naglakaw daplin sa kalsada kauban sa mga nagDawn Rosary.
Gumikan sa makusog nga impact ang biktima, matud pa usab, naguyod pa og mga 12 piye gikan pagkadumbol hinungdan sa angol sa wala nga tiil ug ulo. Daling gidala sa Don Emilio del Valle Memorial Hosp. apan gideklara ni Dr. Jellian Monillas nga dead on arrival (DOA).
Sa dugang pakisusi nasayran nga ang drayber nakatagpilaw sa dihang midasmag sa biktima. ### REYLAO/Wenny Reyes/ ALAN ANDY NALZARO DALAGAN
