GITAKDANG ipadayon ang road widening project sa nasudnong dalan sa lungsod sa Bilar ug Loboc partikular na dapit sa man-made forest nga nagdugtong sa duha ka mga lungsod.
Matud ni Engr. Magiting Cruz, hepe sa Department of Public Works and Highways Kun DPWH 3rd District Engineering Office nga hayan sunod bulan sugdan ang pagpadayon sa widening project nga temporaryong naundang.
Giklaro ni Cruz nga ang DPWH Regional Office 7 maoy implementing agency sa maong proyekto.
Una nang gihimo ang road widening project sa kapin 500 metros nga national road sa Barangay Villa Aurora, lungsod sa Bilar kun asa ang DPWH Bohol 3rd district maoy nag- implementar.
Tungod sa pagpadayon sa proyekto, gibutyag ni Cruz nga laumang dunay mahitabo nga pagkabalda sa dagan sa trapiko sa lugar. Ug gani lagmit pa kining masirad-an depende ra usab sa dagan sa trabaho.
Si Cruz miingon nga sa dihang pag-abot niya sa Bohol, iyang gipa-survey ang maong area. Gi-rekomendar dayon niini nga palapdan ang karsada sa maong dapit tungod sa kaapike sa lugar ug delikado sa disgrasya sa mga sakyanan. ( AND )
