Nipanaw na sa laing kalibotan ang akong suod nga amigo sa eskwela ug sa politika. Dili yanong amigo. Magkaila sa gawas ug sa sud. Magkauban sa ideya ug lihok. Dili yanong mabuak tungod kay nagsumpay ang among paghuna-huna, panglantaw, kahimtang sa kinabuhi ug ambisyon sa katilingban.
Siya si Pedro Gupita. Sans ang among tawganay. Mao usab kini ang tawganay namo sa tanang taga Trinidad nga nagtungha sa BIT. Gani si Vice Governor Victor Balite, Sans man usab ang among tawganay sanglit nasukip man siya sa pamilya sa Trinidad. Sans gikan sa Sano o Paisano, apan mas nilipang ang Sans namong tanan nga taga Trinidad nga nagtungha sa BIT. Dili kini yanong tawganay lamang apan nahimong usa ka tapok sa panghigalaay. Kon lig-on man ang brotherhood sa mga fraternity, murag ikaambat ang among Sans nga taga Trinidad.
Usa sa mga disipolo ni Kristo ang iyang pangalan-Pedro. Kini mao kanunay ang among gamiton nga talikala kon nganong magkasuod kami bisan pa man adunay higayon nga mag-engkwentro ang among partidong gilabanan sa politika sa unang mga panahon. Juan man usab ang akong ngalan nga orihinal gikan sa pangalan nga Juanilo. Nahimo siyang Peter, samtang ako nahimo usab nga Johnny.
Si Sans Peter nakamugna og dili kasarangan nga kasaysayan sa iyang pamolitika sa among lungsod sa Trinidad. Nahimong Kapitan sa Barangay Hinlayagan Ilaud, Trinidad. Nahimong ABC President. Nahimong konsehal sa lungsod ug niining panahona, nagkauban kami sa usa ka termino.
Usa siya sa mga naghatag og ideya aron molambo ang Trinidad Municipal College kauban ni Sans Romulo Balonga human kining nakuha sa LGU sa administrasyon ni Mayor Adel Garcia gikan sa Trinidad Junior College (TJC). Ang iyang kasinatian, dugang sa kasinatian ni Sans Romulo Balonga sa BIT maoy ilang gigamit aron molukso ang populasyon sa TJC nga nahimong TMC gikan sa 65 ka enrolees ngadto sa 700-1,000 ka mga estudyante. Ang paghatag og daghang scholarships ilabi na sa mga anak ug konsehal sa barangay o kaha kapitan ilang giambit gikan sa pamaagi ni Atty. Dioning Balite sa BIT. Saksi ako niining kahimtang tungod kay kanhi man akong nagtudlo sa TJC ug sa usa ka higayon nahimong Head of Student Affairs.
Sama sa uban, daling mabantayan ang pagka-paso sa iyang sinultihan. Bugnaw kon mohatag og pamahayag apan hagtik sa pagbati, emosyon ug pisikal nga aspeto. Kinsay di mahagtik nga usa man ka kanhi atleta, usa ka runner ug sprinter. Nahimong advance ROTC official sa kolehiyo ug naka-training pa og provisionary course sa Phil. Army.
Tungod niini, wa ko makapanagang kon unsaon nako paghuna-huna nganong nitaliwan siya sa dili pa iyang panahon. Matod pa, adunay problema ang iyang atay, cancer na kuno. Di gyud diay matag-an ang panahon.
Sa dihang didto ako sa ospital sa Disyembre sa niaging tuig, si Sans Peter ug ang iyang pamilya ang concerned kaayo sa akong kahimtang. Apan nisunod siya pagpa-admit sa ospital didto sa Cebu. Wala kitay kabalaka sa iyang kahimtang tungod kay lig-on man ang pisikal niyang kahimtang. Apan dihang niabot kanako ang balita, naglibog ko ug niangkon nga dili gayud atong gunit ang atong kinabuhi. Matod pa sa iyang pamilya, anaa sa ilang dugo ang mga sakit nga sama niini. Ug tungod usab sa pressure sa iyang trabaho isip sinaligan ni Gov. Aris ug Cong. Van-van panahon sa eleksiyon, nisamot og kahagba ang iyang panglawas.
Si Sans Peter Gups, adunay ngalan nga iyang natanom sa kasaysayan sa ilang barangay sa lungsod ug sa probinsiya. Ang iyang pagkahanaw sa kalibotan usa lamang ka pisikal nga aspeto. Dili siya patay kon ipabilin siya sa panumduman sa iyang pamilya ug sa mga tawong iyang natabangan panahon sa iyang pagserbisyo.
Goodbye Sans Peter Gups! Ang kalinaw mag-uban kanimo. Salamat sa imong tabang kanamo.
