Sa kamatuoran nga nagkadaghan ug nagkadako ang mga nadakpan ug ang nasakmit nga mga ilegal nga drugas dinhi sa probinsya, ana-a gihapon sa hulga ang katawhan ilabina ang kabatan-onan.
Kapobrehon ang numero-unong nagtukmod sa ordinaryo ug kabus nga katawhan sa ilang pagsulod sa maong ilegal nga kalihukan ilabina ang pagpamaligya.
Dali ra ang kuwarta sa maong ilegal nga negosyo. Ang uban usab ilabina kadtong mga adik, ganahan sa maong negosyo, kay gawas nga makakuwarta, unay sa paggamit niini.
Apan mas bati pamninawon kon mga pinili sa katawhan ang madakpan o malambigit.
Base sa Press Release nga gipagawas sa Duero Police Station sa niaging adlaw, usa ka barangay kagawad ang nasikop sa usa ka buy-bust operation.
Base usab sa usa sa mga hulagway sa Facebook post sa Duero PS, “nipahiyom” ang maong kagawad bisan gi-posasan na samtang nag-imbentaryo ang mga pulis sa giingong ilegal nga tambal.
Dili pa matawag nga “guilty” kay “suspek” pa lang ang maong kagawad kay husayon pa man sa korte human mapasakaan og tukmang kaso.
Apan kon mapamatud-an nga sad-an gayud ang maong barangay opisyal, posibleng katapusan na sa iyang karera sa politika.
Ang nakapait pa, maduhigan ang dungog sa iyang pamilya ilabina ang mga anak, maapektuhan, kon naa man gani.
Ug dili siya maayong ehemplo sa kabatan-onan sa ilang barangay.
Apan mas maayo gayud kon ang mga “big time” ug mga drug lords ang madakpan aron dali ang pagsumpo sa maong ilegal nga kalihukan. Kay posibleng biktima lang usab sila sa kahigayonan, kondili man gani mao gayud ang gusto.
