DAKO kaayo og tabang sa imbestigasyon ang pagsulbad sa krimen nga gigamitan og cellular phone ang Republic Act 11934 o ang subscriber identity module o SIM Card Registration Act sa bag-o lang gilagdaan ni Presidente Bongbong Marcos, kini suma pa ni Lt. Col. Joseph Berondo, hepe sa Police Community Relations sa Bohol Provincial Police Office kun BPPO.
Matud ni Berondo nga mopasayon sa ilang mga imbestigasyon ang bag-ong balaud tungod kay dakong tabang kini sa pagsulbad sa mga krimen nga gigamitan og cellular phone.
Giangkon sa tigpamaba sa Bohol PNP nga maglisod sila sa pagsulbad sa krimen nga gigamitan og cellphone sama sa pagpangilad ug pagpanghulga nga maoy uso karon kung dili marehistro ang sim card tungod kay dili mailhan kun kinsa ang naghimo niini.
Daghan nang panghitabo nga dunay manawag sa telepono ug magpadala og mensahe sa cellphone nga mangilad o manghulga apan naglisod ang kapolisan og ila kun kinsa ang naghimo sa hulga ug pangilad tungod kay mga numero lang ang nakabutang sa cellphone. ( AND )
