TAGBILARAN CITY, Bohol, Dec 6 (PIA) –Laing solusyon nga nahunahunaan sa Acting Provincial Agriculturist: gamiton ang mga dams sa National Irrigation Administration (NIA) alang sa pagpamuhi og tilapia nga isulod sa mga fish cages.
Kini nga hunahuna ming-abut na sa Sangguniang Panlalawigan (SP), kinsa usab pinaagi sa usa ka Committee Meeting sa SP Committee on Agriculture pinangulohan ni Bise Gobernador Victor Dionisio Balite, mingtuki sa sugyot ug naglaraw nga magbuhat og resolusyon aron mahangyo ang hingtungdan nga ahensya sa kagamhanan nga mogamit sa mga dams.
Matud pa ni Acting provincial Agriculturist Larry Pamugas, ang ideya sa paggamit sa mga dams ug mga lugar nga natubigan sa Bohol isip lugar nga buhian sa tilapia, aron mapadaghan pa ug mapalig-on ang sector sa pangisdaan nga karon gipatuya-tuya sa kamahal sa presyo.
Dugang sa luyoluyo sa buhatan sa Agrikultura sa Bohol nga mao nay minglingkod nga hepe, adunay daku kaayo kakuwangon sa tinubdan sa isda nga mapalit ug sa nagkabaga nga panginahanglan niini, pun-an pa sa nagaka daghan panginahanglan sa pagkaon sa mga turista.
Ang Bohol aduna man untay industriya sa binuhi nga tilapia apan kini dyutay ra tungod sa kakuwang sa lugar nga magamit nga buhian niini.
Ang paggamit karon sa mga dams ug mga lugar nga nasanapan sa tubig, alang sa pagpamuhi sa isda sa tab-ang, mahimong makasapal sa kadaku nga panginahanglan.
Gipasabut usab ni Pamugas ngadto sa SP nga una na niyang giopananghid sa NIA ang maong laraw, ug segun pa sa kasayuran nga gikan sa ahensya sa patubig, magkinahanglan sila og resolusyon gikan sa hingtungdang SP aron makapalig-on sa hangyo sa OPA.
Sa laraw sa OPA, sila kauban sa Bureau of Fisheries and Aquatic Resources ang maghipni sa mga tamdanan ug mga pamaagi aron kini mapatuman ug katabangan nga matubag og dyutay ang suliran sa kamahal sa isda tungod sa kakuwang sa supply.
Kini usab makatabang sa libo-an ka mga Bol-anong mag-uuma nga makapamuhi na usab og tilapia agi og dugang dugang sa kita niini.
Sa iyang kabahin, matud ni Bise Gobernador Balite ngapabor siya nga irekomendar ngadto sa kinatibuk-ang SP ang paghimo og resolusyon aron katugotan na sa NIA ang paggamit sa mga dams, nga mao ra usab ang tinubdan sa tubig pang-patubig sa mga kabasakan. (PIA-7/Bohol)
