Ang Sangguniang Panlalawigan sa Bohol mohimo’g imbestigasyon sa dakong power rates nga giptuman sa Bohol Electric Cooperative (Boheco), matud ni beteranong SP member Atty. Tomas Abapo, Jr.
Sa iyang privilege speech sa hawanan sa SP session gahapon, si Abapo nakahuna-huna nga ipa-imbestigar ‘in-aid-of-legislation’ sa SP aron masuta kon unsay hinungdan nga kina-tas-an man kaayo ang ‘power rates’ sa Boheco kay sa ubang mga tig-apod-apod sa kuryente sa halos tibuok Visayas.
Nakutlo ni Abapo ang facebook post sa DYRI sa Iloilo City nga ang Boheco dunay kinatas-an nga power rates nga P19.55 matag kilowatt hour (kwh).
Sa ‘power point presentation’ atol sa session, ang Boheco mao ang kinatas-an ug gisundan sa Noceco (negros Occidental), P18.11/kwh; Noreco (Negros Oriental), P17.84/kwh; Anteco Antique, P16.19/kwh; Coneco (Bacolod), 15.39; ug Akelco (Aklan), P15.25/kwh.
Leyeco (Ormoc), P14.75/kwh; Ileco 2 (Iloilo), P14.90; Ileco (Iloilo), P14.61; Copelco (Capiz), P14.10/kwh; Ileco I (Iloilo), P14.46; ug Guimelco (Gumaras), P12.17/kwh.
Apan, sa wa pa mahuman ang session ang Boheco I nag-post sa usa ka ‘advisory’ nga nagbutyag nga di tinuod ang facebook post kay ang ilang gi-imponer tag P17.20/kwh lang, dili P19.55/kwh.
Apan, bisan na niini, taas gihapon ang P17.20/kwh kon itandi sa ubang mga power distributors sa Visayas.
Gidahum nga tawagon ang tulo ka mga power distributors (Boheco I ug II ug Bohol Light Co, Inc) sa usa ka panagtagbo nga ipatawag sa SP. (rvo)
