Human sa taas nga panahon sa pagpaabot, gipasaka na sa Office of Governance, Accountability and Review (OGAR) ang unang kaso kabahin sa mga kahiwi-an sa pagpadagan sa Kapitolyo.
Ang unang gipuntirya sa kasong administratiba nga gireklamo sa Ogar mao si OIC Provincial Agriculturist Larry Pamugas. Nasayran nga sukwahi sa gipaabot sa kadaghanan, ang kasong administratiba maoy gipili sa Ogar pinangulohan ni kanhi Cabinet Secretary Leoncio Evasco tungod kay mas dali kini nga mahukman.
Sakto si Evasco. Daghan na kaayong kaso ang gisang-at sa Ombudsman ug sa korte nga nangatug hangtud karon. Kinsa may makasiguro nga di mahisama niini kining kaso batok kang Pamugas kon adto kini isang-at sa Ombudsman?
Mao tingali ni ang gisaligan sa mga hingtungdan mao nga namatikdan ang ilang kumpyansa. Kung nahikatug hangtud karon ang mga kaso nga gipasaka kapin na sa 10 ka tuig ang milabay, buot ipasabut nasayud na sila sa sekreto kon unsaon pagpakatug niini.
Ang Ogar gimugna ni Gob. Erico Aristotle Aumentado pinasikad sa Executive Order No. 2 series of 2022 aron pagsuta sa mga kalihukan nga nakalapas sa Anti-Graft and Corrupt Practices Act ingon man sa Code of Conduct and Ethical Standards for Government Officials and Employees.
Ang kaso batok kang Pamugas usa ka sinyas nga gipaabot sa daghang mga Bol-anon sukad pa niadtong Hulyo. Gani, duna nay ubang mga tigpaluyo ni Aumentado ang nagsugod nag alibango samtang nagpaabot.
Gani, bisan ang mga hingtungdan ingon sa nakabaton pa og kaisog nga manghagit nganong wa pa sila sugdi og kiha. Mao ni giingon nga pagbantay sa imong gipangayo. Kay kon ihatag na unya di ka kasagang, napun-an og kauwaw ang imong problema.
Sa nahitabong kampanya alang sa piniliay sa milabayng tuig, ubay-ubay ang mga pasangil sa anomaliya nga gilabay sa mga nagdumala sa Kapitolyo. Mao ni rason nganong dunay naglibog nganong nadugay ang unang kaso.
Apan nasayod si Evasco ug ang Ogar og unsay tinuod nga hinungdan sa katukoran ning maong buhatan. Sukwahi sa gituhoan sa kadaghanan nga kini usa ka pagpanglutos sa mga kaatbang sa pulitika, giklaro ni Evasco nga kini pagtul-id sa mga kahiwian.
“Wa mangitag away ang Ogar,” matud pa ni Evasco. Buot niyang ipasabut nga modangop ra sila sa pagpasaka og kaso kon sa ilang pagduki-duki mailhan ang tinuyo nga pagbuhat sa anomaliya ug pagpangawkaw sa kaban sa katawhan.
Kon ang pagsugod ray lisud, nakalabang na ang Ogar sa una niyang pagsuway.
