PATAY ang usa ka Swiss national human ang motorsiklo nga gimanehoan niíni aksidenteng nabanggaan sa gikasugat nga awto sa intersection sa nasudnong dalan didto sa Brgy. Libaong, lungsod sa Panglao, pasado alas 5 sa hapon niadtong Sabado.
Ang biktima giila nga si Uwe Cornelius Mattheus, 81 anyos, buwag sa asawa, kasamtangang nagpuyo sa Upper Brgy. Sta. Fe, lungsod sa Alburquerque.
Ang suspetsado nailhan nga si Cristenelle Inting y Balaba, 35, minyo, taga Upper Calceta Street, Brgy Cogon, siyudad sa Tagbilaran.
Sigun sa pakisusi sa Panglao Municipal Police Station nga samtang ang biktima nagmaneho sa usa ka Honda RS 125 kolor itom ug yellow nga kumbinasyon nga motorsikllo, nagdagan gikan sa Airport Bolod Road padung sa Libaong. Dihang pag-abot sa intersection duol sa Libaong covered court, usa ka Suzuki Ertiga kolor itom nga gimanehoan ni Inting nagdagan gikan sa Libaong padung sa Lourdes Road aksidenteng nibangga sa motorsiklo sa biktima. Ug naguyod kini mga 27 ka tiil gikan sa nahitaboan ug nibunggo kini sa bongbong sa usa ka tindahan.
Matud sa taho nga gumikan sa kakusog sa maong pagkabangga, namatay diha-diha dayon ang nasampit nga langyaw.
“Imbes mo-brake, gasolinador ang naduot sa drayber sa Ertiga, ” butyag ni PSMS Armand Akil sa Panglao PNP.
Gikustodiya sa Panglao PNP ang maong drayber. Apan gikatahong gibuhian human nagkasinabot sa ka- live-in sa nasampit nga biktima. (ALAN ANDY NALZARO DALAGAN)
