Lahi gyud ang taga ato. Gipamatud-an kini ni Gob. Aris Aumentado upat ka bulan pa lang sukad sa iyang paglingkod sa katungdanan. Sa mga gagmayng butang, makita na dayon unsay kalainan sa taga ato.
Sa iyang unang adlaw, didto siya mikaon sa kan-anan sa mga kawani tapad sa Kapitolyo. Wa kini buhata sa mga nauna kaniya di tingali tungod kay wa sila moangay sa sud-an nga gibaligya didto apan tungod kay wa kini mosantop sa ilang huna-huna.
Tungod tingali kay nagdaku siya pipila ra ka metro gikan sa gibarugan sa bag-ong Kapitolyo, di na tingali maihap kon kapila na siya molabay niining dapita sa wa pa tukori niining edipisyo nga iya karong gipangulohan. Gani, siya ray nasayud kon pila sa mga bay nga naglibot niini iya nang nasudlan.
Di lang sa Kapitolyo apan daghang mga yanong kan-anan ang iyang nasulayan sa nagkalain-laing dapit sa lalawigan sukad pa sa iyang kabatan-on. Ug tungod niini, duna na siyay mga suki nga iyang balil-balikan kon tugotan sa panahon.
Sa mga pipila ka higayon nga way nagpaabot nga pirmahonon o kaha mahimo kining malangan ug dyutay, gipahimuslan ni Gob. Aris ang panahon aron mokuyog sa mga bikers o kaha magduwag basketbol. Lakip kini sa mga paboritong lingaw-lingaw sa mga Bol-anon ug lakip niini ang gobernador. Di na tingali sama kaabtik ug kalagsik sa iyang kabatan-on apan maila nga dunay higayon nga nagbaton siya niini.
Di na lang ta maghisgut sa mga dagkung proyekto nga iyang gilusad kay sayo pa kaayo aron makahimo og lig-on nga hukom. Apan bisan sa iyang kanunay nga pagduaw sa mga isdaan, gipakita ni Gob. Aris nga gibati niya ang suliran sa kamahal sa palaliton.
Usa kini ka daku ug nagpadayon nga tanghaga sa kadaghanan: ngano nga mahal kaayo ang isda niining lalawigan nga gilibutan og tubig. Nahinumdum kita nga kaniadto dihay gipasi-atab nga kalihukan aron kuno tuki-on kining maong suliran. Apan imbes nga dunay alibyo, nisamut na hinoon ang problema.
Di ta makasulti nga ang solusyon nga gipatuman karon kabahin ning maong suliran maoy husto o kaha magpadayon. Apan daku na kaayong butang nga gipangitaan kining solusyon ug matag karon ug unya makatilaw og barato ang mga Bol-anon.
Tungod kay dinhi siya magdaku ug magpabilin siya dinhi, natural nga maningkamot si Gob. Aris di lang pagsulbad ning maong suliran alang sa iyang pamulitika apan tungod kay nakaila siya sa mga Bol-anon. Pag-abot sa panahon, sudyaan o kaha tulisokon siya sa iyang mga kaliwatan, higala ug silingan kon mapakyas siya pagsulbad niini.
Kon itandi niadtong igo ra moabut dinhi aron molansad unya mobiya ining kahuman, lahi gyud ang taga ato nga way plano nga mobiya kon natapos na ang ilang termino.
