TAGBILARAN CITY, Bohol, September 23 (PIA)–Gipahibalo sa Department of Social Welfare and Development (DSWD) Field Office VII sa tanang panimalay sa Pantawid Pamilyang Pilipino Program (4Ps) sa rehiyon 7 nga temporaryong malangan ang paghatag sa cash grants sa 82,922 ka panimalay sugod sa Pay Period 3 (Hunyo-Hulyo).
Kini base sa resulta sa Listahanan 3 nga nag-ila nga dili na sila kabos. Apil niini ang 15,443 ka panimalay nga wala naapil sa ‘household assessment’ sa Listahanan 3 niadtong 2019.
Gipasabot sa DSWD nga kini gipahigayon isip pagsunod sa Balaod 11310 o 4Ps Act. Subay niining balaod nga ang maong kwalipikado nga mga kabos nga panimalay gikan sa Listahanan ang mamahimong miyembro sa 4Ps.
Aron masiguro nga padayon ang paghatag sa sakto nga suporta sa mga kwalipikado nga benepisyaryo sa 4Ps, ang DSWD kasamtangan nagpahigayon og validation sa resulta sa Listahanan 3.
Giawhag sa buhatan ang mga 4Ps nga magpa-interview kun maadtuan sa mga kawani sa DSWD alang sa gipahigayon nga validation.
Sumpay sa katuyuan niining programa nga padayon nga mahatagan og akses ang mga benepisyaryo sa 4Ps sa mga serbisyo, ang mga nagkalain-laing programa sa ubang nasyonal ug lokal nga panggamhanan makatubag sa ilang mga panginahanglanon.
Gipasalig sa DSWD nga makalaum ang mga benepisyaryo sa 4Ps nga ang ilang buhatan padayon nga naghimo og aksyon aron dali nga mahuman ang validation labi na kadtong wala pa naapil sa enumeration.
Ang DSWD maghatag og dugang impormasyon kabahin niini pinaagi sa mga City/Municipal Links.
Ang 4Ps mao ang nag-unang programa sa gobyerno sa pagwagtang sa kakabus nga namuhunan sa kahimsog, nutrisyon, ug edukasyon sa mga kabus nga kwalipikado nga mga panimalay. Kini, uban ang psychosocial ug educational nga mga sangkap nga gihatag pinaagi sa Family Development Session (FDS), nanguna sa mga benepisyaryo sa pagpauswag ug pagpadayon sa kaayohan. (ecb/PIA7-Bohol)
