Anaay mga tigpaniid sa politika sa Bohol nga niingon nga anaay mga karaang politiko nga naglingkod sa nagkadaiyang posisyon, ang uban napildi sa niaging piniliay, nga magpapili kuno og balik sa pinakataas ug taas usab nga mga puwesto sa gobyerno.
Giingong magpapili karong 2025 ug nagsugod na og porma sa ilang mga kandidato.
Ubos sa atong Batakang Balaod, walay problema ang pagpapili gikan sa kagawad sa barangay hangtud sa pagka-presidente, kon pasado sa gilatid nga mga kwalipikasyon.
Daghang makapasar sa kwalipikasyon ilabina kon makabasa ug kamao mosuwat.
Ug bisan gani kadtong walay hamong sa pagpanerbisyo ug sa balaod, puwede gihapon makadagan pagka-ngan nga nigakos kita sa demokrasya.
Ang problema kadtong mga anaay lantip nga panghunahuna, anaay salapi ug impluwensyado apan dili maayong mga lider.
Hangtud karon, anaay daghan nila nga naggunit sa taas nga mga posisyon.
Ang problema, daghan sa katawhan nga nailad ug posibleng mailad ug magpailad gihapon ilabina kon bundakan og ginatos o nilibo.
Kon magpadayon ang maong sistema ug dili magmatngon ang katawhan, luoy ang lungsod o probinsya.
Ayaw na og pailad sa giilang mga ‘traditional politicians’ o ‘trapos’ nga mga abusado sa gahum ug kurakot, kay ang katawhan maoy labing mag-antos.
