TAGBILARAN CITY, Bohol, January 17 (PIA)–Ang Kagamhanan sa Probinsiya sa Bohol (PGBh) pinaagi sa Office of the Provincial Agriculturist (OPA) mopahigayon na usab sa Ubi Festival karong Enero 26-30, 2023 sa Old City Airport, barangay Cogon ning syudad sa Tagbilaran.
Ang 5 ka adlaw nga Ubi Festival nagtumong sa paghatag og pasidungog ug pag-ila sa mga Bol-anon nga mag-uuma ug mangingisda nga mitabang sa agrikultural nga paningkamot sa kagamhanang probinsiyal.
Kining ika-22 nga pista sa ubi magpakita sa lain-laing klase sa ubi sama sa: Baligonhon, Binanag, Gimnay, Binato, Iniling, Tam-isan, Kabus-ok, ug ang sikat nga Kinampay.
Si Gertrudes Fuentes, Chief sa Crops and Productivity Division sa OPA kinsa mao usab ang focal person sa niining festival nagkanayon nga ang kalihukan sugdan pinaagi sa motorcade sa ala 1 sa hapon sa Enero 26, 2023 nga moagi gikan sa Capitol Grounds – New Capitol Site Road – Hangos Street – J. A. Clarin St. -City Hall Grounds – Calceta St.- St. Jude Hospital – CPG Avenue – City Airport Road – paubos sa venue alanga sa opening program.
Sa pagbukas nga programa, si Gob. Erico Aristotle Aumentado gitakdang mohatag sa iyang makapadasig nga mensahe. Human niini pangunahan usab sa gobernador ang pag-turn-over sa mga materyales sa pagtanum sa ubi/mga seedling sa prutas ngadto sa mga benepisyaryo, pag-turn-over sa RPC ngadto sa bag-ong partner nga organisasyon sa mag-uuma (PIWARDEP), ug ang pagputol sa laso ug pag-abli sa mga exhibit.
Sama sa naandan, ang festival ipasiugda sa lain-laing mga sangka nga pagasalmotan sa mga partisipante nga gikan sa mga lungsod nga adunay ubi display sa mga booth nga ilang tukoron sa Old City Airport nga himuon sa ikaduhang adlaw, Enero 27.
Ang mga sangka nga adunay premyo nga nakataya mao ang mga mosunod: Most Participative LGU, Pinaka Contest, Balak Contest, Jingle Contest, OPM Singing Contest (Female Category), OPM Singing Contest (Male Category), Kuradang Contest (Classical not Modern Kuradang), Cook- Off ug ang Motorcade.
Ang awarding sa mga mananaog gikan sa lain-laing contest ug ang pag-ila sa mga partisipanteng LGUs himuon sa ikalimang adlaw, Enero 30, diin si Gob. Aumentado maoy mangulo gihapon sa kalihokan.
Sa culmination program usab sa Ubi Festival, makadawat sa ilang mga awards ug recognition ang mga mananaog sa 22 ka lain-laing kategorya sa Suhid sa Malampusong Mag-uumang Bol-anon 2022 ug ang mga assisting technician niini. (ecb/PIA7-Bohol)
